DILI, 28 fevereiru 2024 (TATOLI)—Ministru Komérsiu no Indústria (MCI), Filipus Nino Perreira, hateten pagamentu ba empreza sira ne’ebé mak fa’an foos subsídiu sei hein Vise Primeriu Ministru no Ministru Asuntu Ekonómiku no Ministru Turizmu no Ambiente, Francisco Kalbuadi Lay, fila husi Abu Dabhi.
“Daudaun ne’e ha’u sei halo diskusaun ho empreza sira ne’ebé mak fa’an fos subsídiu tanba, ita sei hein Vise-primeriu Ministru no Ministru Asuntu Ekonómiku no Ministru Turizmu no Ambiente Francisco Kalbuadi Lay fila husi Abu Dhabi tanba nia mak bele foti desizaun,” Ministru Filipus Nino Perreira informa ba jornalista sira bainhira ramata reniaun Konsellu Ministru iha Palásiu Governu, ohin.
Iha sorin seluk, Empreza Loja kreativu Furak, Yati Zaka, hateten, daudaun ne’e, sira-nia parte karimbu foos subsídiu nia to’o mai ona, maibé seidauk implementa foos subsídiu faze daruak nian tanba sei hein pagamentu hosi Governu hafoin implementa.
“Ami seidauk implementa foos subsídiu ida ne’e, tanba ami sei hein Governu halo pagamentu ba foos subsídiu toneleda 750 ho nia montante orsamentu hamutuk milliaun $1.5 mak foin implementa foos subsídiu faze daruak nian,” Yati Zaka hateten ba Agência Tatoli, iha nia kna’ar fatin Bidau kuarte ne’e.
Nia hateten, daudaun armajen Loja Kreativu Furak nian foos iha ona no tau hotu ona karimbu no empreza rasik hato’o karta ba iha Governu liu husi Ministériu Komersiu no Indústria oinsá atu rezolve tiha pagamentu mak foin bele implementa foos subsídiu ne’e rasik.
“Ami-nia sasán preparadu hotu ona hanesan karimbu iha ona ami-nia fatin oinsá ami tau karimbu hakerek subsídiu ho objetivu ema labele halo manipulasaun ba folin foos iha área remota sira, tanba antes ne’e retallista sira balun mai sosa ba fa’an fali iha área remota folin la tuir Governu tau ne’e, entaun ida ne’e ami hein Governu selu ami fa’an ona foos subsídiu ida ne’e,” nia hateten.
Antes ne’e, sira-nia parte asina ona nota entendimentu ho Governu, atu impelmenta foos subsídiu hamutuk 750 tonelada ho marka Beruang 20kg nia implementasaun kada faze.
“Tuir akordu ne’ebé ita halo ho Governu atu implementa foos subsídiu durasaun fulan tolu, kada fulan ida faan 250 tonelada to’o ramata,” nia relata.
Kona-ba folin antes ne’e $9 maibé agora sira-nia parte sei ko’alia filafali ho Governu kona-ba folin ne’e.
“Kona-ba folin antes ne’e, $9 maibé ami sei ko’alia filafali ho Governu, atu mantein ka mudansa ne’ebé ami seidauk bele fó sai folin, karik atu fó sai bainhira atu implementa,” nia konklui.
Notísia relevante:Reprezentante povu husu MKI implementa subsídiu faan foos to’o área rurál
Jornalista : Felicidade Ximenes
Editór: Rafael Ximenes de A. Belo
