Sobrevivente Waimoris husu jovens sira hapara violénsia hodi kaer metin unidade nasionál
DILI, 12 Novembru 2026 (TATOLI)—Juventude Lorico Aswa’in no Sobrevivente Masakre Santa Cruz, José da Cruz ‘Waimoris’, husu joven sira hapara violénsia hodi kaer metin unidade nasionál.
“Joven agora para ona ho violénsia, kaer metin unidade nasionál, para ona ba odiu malu, para ba oho malu. Timor ne’e ita hotu nian, joven sira mak futuru nasaun ne’e nian. Imi foku ba eskola matenek dezenvolve rai ne’e. Ami uluk eskola la foku tanba hakarak luta ba ukun-an. Ohin loron, tempu imi-nian hodi hadi’a rai ida-ne’e,” Juventude Loriku Aswain, mate restu 12 de Novembru, José da Cruz ‘Waimoris’, hateten ba Agência TATOLI iha Santa Cruz, Kinta ne’e.
Nia dehan, iha tempu rezisténsia luta ba libertasaun nasionál ne’e nia ho juventude seluk la konsege eskola ho di’ak, tanba sira hili luta ba ukun-an hodi husik sira-nia eskola, husik uma, husik família hodi fó an ba mate.
Ohin loron, Waimoris dehan, joven sira la presiza tan mate maibé joven sira presiza eskola atu hetan matenek, presiza hadi’a rai ida-ne’e ne’e povu Timor-Leste barak mak sosa ho ruin no raan.
Nia dehan, iha tempu rezisténsia ne’e juventude loriku aswa’in la hanesan tanba mai husi fatin oioin, kór oioin no arte marsiál oioin hamutuk hodi luta ba ukun rasik an.
“Ami uluk iha kór oioin, iha arte marsiál oioin, maibé ami unidade metin tebes. Ami kaer malu metin ho objetivu ida de’it mak luta ba ukun-an,” nia dehan.
Nia hateten, ida-ne’e sai hanesan lisaun boot liu ba timoroan sira ohin loron tanba ho uluk ne’e juventude sira uluk maske mai ho kór oioin maibé bele hamutuk hodi mate ba rai ida-ne’e, tanbasá mak ohin loron iha ámbitu ukun-an laran tanbasá joven sira labele hamutuk hodi moris ba rai ida-ne’e.
Iha Semitériu Santa Cruz, mate restu Waimoris hamriik haree joven sira-ne’ebé mai komemora loron Masakre Santa Cruz ne’e nia matan-been monu ne’e la’os tanba tanba triste de’it maibé tanba esperansa.
Nia fiar, juventude sira sei kontinua saida mak sira hahú, mak joven sira ohin loron la’ós kontinua luta ho kilat maibé ho eskola, ho pás no ho unidade.
“Komemorasaun ba tinan ida-ne’e sente kapaas tebes, furak, tanba partisipa ho joven barak. Komemorasaun ba tinan ne’e hamutuk tinan 35, ami sira uluk se hirus matan iha ne’e idade avansadu hotu ona, entaun joven sira tenke banati tuir saida mak ami halo. Maibé joven agora nian luta ba dezenvolvimentu no kontribui ba aás,” nia dehan.
Mate Restu Waimoris hanoin hikas loron ne’ebá, loron ne’ebé sira fó an ba mate, la hatene sé mak sei moris no sé mak sei mate.
“Tinan 35 ba kotuk, ami lori ami-nia sakrifísiu hodi fó an ba mate. Sorte di’ak mak ami sira-ne’e sei moris, maibé maluk barak mak mate ona, ita tenke fó onra ba sira,” nia dehan.
Jornalista : Hortêncio Sanchez
Editór : Cancio Ximenes
