DILI, 09 Maiu 2025 (TATOLI)—Inspetora Jerál AIFAESA, Odete da Silva Viegas, hateten durante Janeiru to’o Maiu, tinan ne’e, Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA) konsege arrekada reseita ba kofre Estadu hamutuk rihun $80 husi emprezáriu sira-ne’ebé komete infrasaun.
“Husi Janeiru to’o Maiu ami hatama koima ba kofre Estadu hamutuk rihun $80 husi emprezáriu sira iha kapitál Dili inklui iha munisípiu sira-ne’ebé komete infrasaun no fatin komérsiu ne’ebé ami tama ona hamutuk 600. Entaun, serbisu ida-ne’e la’ós serbisu ki’ik maibé serbisu ida-ne’e boot. Ita hateten katak benefísiu mós ba ita-nia kofre Estadu. Ita mós bele tulun Estadu atu hetan mós retornu,” Odete informa ba jornalista sira, iha resintu AIFAESA, Matadouru, Dili, sesta ne’e.
Nia relata, koima ne’ebé mak sira foti ne’e rezultadu husi loja no supermerkadu sira-ne’ebé mak hetan sansaun husi AIFAESA no osan sira-ne’e hatama fali ba iha kofre Estadu.
“Ami foti koima husi ema sira-ne’ebé mak halo sala ami fó sasaun. Osan tenke hatama ba kofre Estadu. Koima sira-ne’e inklui mós munisípiu maibé maioria iha Dili, no ida-ne’e seidauk inklui Empreza Perisos, Lisun no kompañia boot sira seluk,” nia dehan.
Nia haktuir, AIFAESA mós taka permanente industria rua hanesan Frizy ne’ebé prodús Juice, Supermerkadu Seara, depois taka temporária hamutuk 26, reativa hamutuk 14, iha estabelesimentu hitu mak sei iha prosesu ba teste laboratóriu nian.
Jornalista: Felicidade Ximenes
Editór: Xisto Freitas da Piedade
