KOVALIMA, 30 Setembru 2025 (TATOLI)- Prezidente Autoridade Munisípiu Kovalima, Miguel Armada Cardoso, hahú fahe ona tarefa servisu ba sesaun sira hodi halo preparasaun iha ámbitu atu realiza festivál fronteira 2025 iha munisípiu Kovalima.
“ Ita-nia preparasaun atu organiza eventu festivál fronteira 2025 iha munisípiu Kovalima, nune’e orienta ona kada komisaun atu hala’o servisu másimu hodi realiza eventu ne’e,” PAM ne’e relata hafoin prezide enkontru ho sesaun sira, iha salaun AMC, ohin.
Festival Fronteira 2025 ne’ebé hala’o iha munisípiu Kovalima resposabiliza husi Ministériu Juventude, Desportu, Arte no Kultura (MJDAK) no sei organiza atividade desportiva , Sekretáriu Estadu Arte no Kulturál (SEAK) maka hatudu kulturál no Centru Nasionál Chega atu hala’o atividade hala’o diálogu entre joven.
Atividade deportiva ne’e fahe ba modalidade neen atu harame festivál fronteira iha Kovalima mak hanesan futebol mane ,futsal feto,basket mane,voli feto, atletizmu kilometru 7 no ba mane kilometru 10 no kurridade Kavalu klase B no C.
Atividade sira seluk ne’ebé maka organiza husi Sekretáriu Estadu Arte no Kulturál (SEAK) maka dansa kulturál mai husi munisípiu Bobonaro, Kovalima no mós Rejiaun Administrativu Espesiál Oekuse-Ambeno (RAEOA).
Centru Nasionál Chega atu hala’o atividade hala’o diálogu entre joven sira iha Timor-Leste no mós husi nasaun viziñu Indonézia .
Festivál Fronteira 2025 iha munisípiu Kovalima nia orsamentu mai husi Sekretáriu Estadu Arte no Kultura, Ministériu Juventude, Desportu, Arte no Kultura (MJDAK) no mós mai husi Centru Nasionál Chega! hamutuk 216.414
Jornalista: Celestina Teles
Editór:Florencio Miranda Ximenes
