DILI, 30 Setembru 2025 (TATOLI)-Community Based Rehabilitation Network Timor-Leste (CBRN-TL) kontinua preokupa ho Ema ho Defisiénsia (EhD) sira ne’ebé kontinua hetan diskriminasaun oioin atu partisipa iha prosesu dezenvolvimentu país.
Diretora Ezekutiva CBRN-TL, Norberta Vicente Soares da Cruz, hato’o kestaun referida hafoin hala’o audiénsia ho Komisaun F iha Parlamentu Nasionál ne’ebé trata Asuntu Saúde, Igualdade Jéneru no Inkluzaun Sosiál.
Nia dehan objetivu husi audiénsia ne’e aprezenta rezultadu advokasia liga ho oinsá atu asegura inkluzaun EhD, liuhusi implementasaun Konvensaun Direitu Ema ho Defisiénsia no mós Planu Asaun Nasionál Ema ho Defisiénsia iha Timor-Leste.
Nia rekoñese katak país iha kompromisu boot hodi asegura no proteje direitu ne’e ho inkluzaun.
“Audiénsia ne’e ami husu Komisaun bele fiskaliza no monitoriza implementasaun, liuliu lei no polítika sira ne’ebé sei diskrimina ema ho defisiénsia”, nia hateten ba jornalista sira hafoin ramata audiénsia iha Parlamentu, ohin.
Hodi fó ezemplu iha dekretu-lei apoiu subsídiu ba ema ho defisiénsia utiliza termu iha diskriminasaun. “Signifika husi inválidez ne’e katak, la vale, karik bele rekoñese ami ema ho defisiénsia sei hamriik nafatin iha ne’e, signifika ami vale ba iha sosiedade ida ne’e”, nia preokupa.
Nune’e, rekomenda atu muda termu referidu hodi adapta tuir Konvensaun EhD iha artigu 1 ne’ebé hakerek kona-ba EhD la’ós inválidez. No atu haree polítika sira iha setór saúde nian, liuliu instalasaun saúde sira barak ninia fasilidade la adekuadu atu asesu.
“Purezemplu, sira mai ho defisiénsia fízika, oinsá mak postu saúde sira fornese ai-tonka ka kadeira roda hodi bele fasilita atendimentu”, dehan.
Tuir nia, iha polítika edukasaun inkluziva haree eskola barak mak ho distánsia dook no seidauk asesivel, tanba manorin-na’in barak seidauk iha koñesimentu natoon atu hanorin estudante mai ho nesesidade espesífika.
Durante audiénsia, Komisaun rejista no sei tau atensaun hodi rekomenda ba parte Ezekutivu atu toma atensaun.
Jornalista: Nelson de Sousa
Editora: Maria Auxiliadora
