DILI, 30 Setembru 2025 (TATOLI)—Inspetora Jerál Autoridade Inspesaun no Fiskalizasaun Atividade Ekonómika Sanitária no Alimentár (AIFAESA, sigla portugés), Odete Viegas, hateten husi fulan-Janeiru to’o Setembru ne’e, AIFAESA konsege halo ona inspesaun ba operadór ekonómiku sira hamutuk 3088 iha territóriu nasionál.
Notísia Relevante:
Nia hateten, atividade inspesaun iha territóriu laran tomak iha Q3 nian sira termina reinspesaun iha Oekusi, entaun hahú kedas husi fulan-Janeiru to’o agora ita konsege halo inspesaun ba fatin estabelesimentu operadór ekonómiku ne’ebé kompostu husi komérsiu, indústria no turístika hamutuk 3088.
“Ami-nia meta ba inspesaun ne’e katak tinan ida ami tenke halo inspesaun ba estabelesimentu hamutuk 4.000, entaun ita espera katak iha Q4 ita bele ultrapasa meta ne’ebé ami iha,” Inspetora Jerál ne’e informa ba jornalista sira iha nia knaar fatin, Matadoru, ohin.
Enkuantu kona-ba koima ba operadór ekonómiku sira ne’ebé komete infrasaun ka irregularidade hanesan, faan sasán laiha ijiéne, sasán estragadu no espiradu sira hodi selu multa ba AIFAESA hahú husi fulan-Janeiru to’o Setembru hamutuk $276,470, no ema-ne’ebé komete irregularidade ne’e hamutuk 491.
Jornalista : Alexandra da Costa
Editór : Cancio Ximenes
