DILI, 30 Setembru 2025 (TATOLI)-Ministra Finansa, Santina Cardoso, fó-sai katak verba orsamentu ne’ebé prevee ba eis titulár sira sei kontein hela iha proposta Orsamentu Jerál Estadía (OJE) 2026, tanba verba ida-ne’e sei aprezenta ba Parlamentu Nasionál mak foti desizaun.
“Loos duni horisehik Prezidente Repúblika foin mak promulga lei pensaun mensál vitalísia, nune’e orsamentu ne’ebé ami lori tenke hakerek iha livru sira hotu, entaun ohin mós ami hato’o ona ba Konsellu Ministru”, Ministra Finansas ko’alia iha Palásiu Governu, tersa ne’e.
Notísia relevante: Prezidente Ramos-Horta promulga Lei Revoga Pensaun Mensál Vitalísia
Nia dehan, proposta orsamentu pensaun vitalisia prevee hela liuhusi dalan ida fali, bainhira tama iha Parlamentu Nasionál tenke halo proposta (alterasaun).
Tanba tuir nia, orsamentu ba tinan ida ne’e kuaze millaun $5 no ba tinan oin mós montante hanesan.
“Entaun orsamentu sira-ne’e depende ba Parlamentu Nasionál mak deside atu aloka fali ba setór idahne’ebé ka atu redus,” nia hateten.
“Bainhira lei iha ona entaun ami tenke halo tuir lei, katak sei la halo transferénsia ba eis titulár sira tanba orsamentu pensaun vitalísia sei kontein hela iha Orsamentu Jerál Estadu tinan 2026,” nia esplika.
Notísia relevante: KM aprova proposta OJE 2026 ho montante billaun $2,291 no aban aprezenta ba PN
Jornalista: Alexandra da Costa
Editór: Cancio Ximenes
