DILI, 30 Setembru 2025 (TATOLI)-Diresaun Nasionál Agrikultura, Ortikultura no Protesaun Planta, Ministériu Agrikultura, Pekuária, Peska, no Floresta (MAPPF) kontinua sosa fini no distribui ba to’os-na’in sira atu kuda.
Diretór Nasionál Agrikultura, Ortikultura no Protestaun Planta, Lúcio Nuno, dehan daudaun akontese mudansa klimátika ne’ebé udan monu rai la tuir tempu loloos.
“Ita-nia preparasaun hasoru mudansa klimátika mak ita distribui ona fini ba agrikultór sira, hanesan batar no hare kulit hamutuk tonelada 330. Ita mós planeia iha tempu badak sei sosa tan batar tonelada 20 ho orsamentu rihun $200-resin hodi antesipa. Fini ne’ebé distribui kuda la moris karik atu distribui filafali ba komunidade”, Lúcio Nuno dehan ba Tatoli, ohin.
Nia dehan fini batar daudaun ne’e agrikultór sira kuda ona tonelada 80, maibé MAPPF mós fó ona atensaun katak fini ne’ebé distribui ona kuda karik iha rezerva, tenke asegura, tanba udan tau ne’e la tuir tempu.
“Ita tenke asegura katak, fini ne’ebé sira kuda, kuidadu tanba, ta’uk mak kuda tiha la moris. Ida-ne’e mós difikuldade boot ida, entaun ita-nia parte mak distribui fini, asegura fini, no orientasaun tékniku atu haree ba hasa’e produsaun”, dehan.
Iha tinan kotuk, iha fulan-Outubru no Novembru, MAPPF fahe uluk ona hare tonelada 120 no batar 100.
“Husi fini ne’ebé ita distribui [kuda ona iha rai] ektare 37.691 iha munisípiu sira hanesan Bobonaru, Ermera, Likisá no seluk tan. Tuir previzaun, karik rezultadu di’ak hotu, tinan ne’e ita sei kolleta hare tonelada 158.274 [no konverte] ba foos tonelada 91.964”, nia informa.
Ministériu mós apoia subsídiu kombustivel ba agrikultór sira iha munisípiu hodi halai natar, tanba ida-ne’e polítika Governu nian atu tulun agrikultór sira hodi hasa’e produsaun iha rai-laran.
MAPPF prevee rihun $500-resin ba kombustivel gratuitu no jere husi Serbisu Agrikultura Munisípiu hodi atende agrikultór sira.
Jornalista: Arminda Fonseca
Editora: Maria Auxiliadora
