Reabilitasaun estrada iha Lolotoe presiza empreza ne’ebé iha esperiénsia
BOBONARU, 30 Setembru 2025 (TATOLI)-Komunidade husu ba Ministériu Obra Públika atu buka empreza nasionál no internasionál ne’ebé iha esperiénsia mak kaer projetu reabilitasaun estrada liga ba postu administrativu Loloto’e, munisípiu Bobonaru, nune’e bele garante kualidade obra.
“Governu atu fó projetu ba kampañia ida ne’ebé serbisu di’ak, esperiénsia, tanba estrada sa’e mai liu Ozo ho Zulo-il ne’e kada tinan sempre hetan estragu husi dezastre. Governu gasta osan barak hadi’ak ba hadi’ak más aat nafatin. Tanba ne’e, tenke fó ba empreza di’ak mak kaer para problema sira ne’e labele akontese tan”, komunidade Agustinho Lopes de Jesus dehan ba Tatoli iha Hali-Mesak, ohin.
Nia argumenta katak prosesu konkursu públiku mós tenke loke ho tranparénsia, nune’e labele hamosu impedimentu husi indivíduu no grupu balu.
“Dalabarak projetu boot hanesan ne’e sempre mosu impendimentu, tanba hakarak hetan porsentu hanesan uluk iha Kailaku nia ne’e. Ida-ne’e ami Lolotoe lakohi, ami hakarak mak estrada ne’e di’ak de’it, tanba ami terus ba estrada aat tinan barak ona”, nia preokupa.
Feliciana Pereira mós reforsa katak Governu presiza aselera prosesu konkursu públiku, tanba komunidade halerik ba estrada tinan barak ona.
“Tempu udan ami Lolotoe ne’e sente izoladu loos. Foos, mina no ai-han bazika sira folin sa’e, tanba estrada la di’ak. Ami presiza estrada ne’e halo agora nune’e ami Lolotoe mós bele sente hanesan ho sira Maliana, tanba agora iha Maliana estrada kaber ona”, nia relata.
Antes ne’e, Governu liuhusi reuniaun Konsellu Ministru orienta Komisaun Nasionál Aprovizionamentu loke konkursu públiku ba projetu estrada liga husi suku Lontas bá Lolotoe Vila ho distánsia kilómetru 8,9.
Notísia relevante: Komunidade ezije aselera konkursu públiku projetu estrada Lolotoe
Jornalista: Sergio da Cruz
Editora: Maria Auxiliadora
