BOBONARU, 30 Setembru 2025 (TATOLI)-Diretór Servisu Munisipál Saúde (DSMS), Autoridade Munisípiu Bobonaru, Gil Bernardo Vicente, husu ba komunidade atu kuidadu ho moras raiva, tanba vírus ne’e hahú ameasa saúde públika no hamate ona ema na’in-lima.
“Agora ita iha situasaun ne’ebé ladún di’ak, iha ameasa ne’ebé agora mai daudaun ita mak raiva. Ita rejista ona ema na’in-lima mak mate”, nia hateten iha salaun Sakrojes Maliana.
Gil dehan liuhusi kampaña prevensaun raiva, ekipa sira buka tuir hela vítima asu tata ne’ebé to’o agora seidauk simu vasinasaun.
“Halo favór hakbesik-an mai instalasaun saúde atu ita bele halo intervensaun ho vasina, tanba vírus raiva ne’e risku atu mate ne’e boot. Kuandu ita la vasina, nia hatudu ona sintoma entaun salvasaun laiha ona, más kuandu ita vasina nia sei salva ita 100%”, nia apela.
Xefe Sentru Saúde Komunitáriu, iha postu administrativu Maliana, Nascimento Mau Leto, reforsa katak vasinasaun mak dalan úniku atu prevene-an husi vírus raiva.
“Raiva ne’e kuandu hatudu sintomas ona, ita tenke ser mate, más kuandu vasina 100%, ema ne’e la mate. Durante ne’e, pasiente ne’ebé mate barak liu la vasina, ne’ebé husu favór hadook-an husi asu, prevene-an, tanba moras ne’e perigu ba ita-nia vida”, nia dehan.
Diresaun Servisu Munisipál Saúde Bobonaru rejista, husi janeiru to’o Setembru, kazu asu tata ema hamutuk 300-resin.
Notisía relevante: Pasiente ida iha HRM mate ho sintoma raiva
Jornalista: Sergio da Cruz
Editora: Maria Auxiliadora
