DILI, 01 Outubru 2025—Inspetór Jerál Ministériu Edukasaun (ME), Rodolfo Aparício informa ME planeia atu halo reabilitasaun ba eskola sira-ne’ebé oras ne’e okupa husi komunidade iha territóriu.
“Governu iha ona planu atu halo reabilitasaun ba eskola sira-ne’ebé okupa husi komunidade liuliu iha arredór eskola. Ita husu okupante book-aan daudaun ona tanba ita planu atu hadi’a eskola ne’ebé laiha kondisaun,” Aparício dehan ba TATOLI iha INFORDEPE Balide, Kuarta ne’e.
Notísia relevante: Okupante sira hahú hamamuk resintu Eskola ESJ 10 Dezembru
Nia haktuir iha fulan hirak bá kotuk Ministériu Edukasaun hamutuk ho Servisu Edukasaun Munisípiu Dili no Ekipa Jestaun Merkadu hasa’e ona okupante iha eskola Ensinu Sekundáriu Jerál 10 Dezembru no Ensinu Báziku Bidau Akadiruhun.
“Daudaun ne’e okupante iha ESJ 04 Setembru UNAMET Balide, EBF Doque Caxias Bemori no eskola seluk tan iha mak seidauk maibé tempu badak ita notifika. Ita notifika ona Eskola Sérgio Vieira de Mello no halo ona sensibilizasaun, hein de’it sira prepara,” nia dehan.
Notísia relevante: ME fó karta notifikasaun bazeia ba númeru okupante iha arredór eskola
Iha fatin seluk, Diretór Servisu Edukasaun Munisípiu Dili, Sabino da Costa Pereira hateten tuir planu sei kontinua ba Eskola Sérgio Vieira de Mello, depoiz eskola Sekundáriu Jerál 04 Setembru UNAMET Balide, hafoin ba eskola sira-neʼebé mak ema hela inklui pré-eskolár ida iha Kulau Bekora nian.
ME rejista uma-kain hamutuk 72 ne’ebé okupa arredór eskola iha Munisípiu Dili. Husi totál ne’e uma-kain 52 hela iha arredór Eskola Ensinu Báziku ho filiál sira, restante okupa eskola Ensinu Sekundáriu Jerál no Tékniku Vokasionál.
Eskola sira-ne’ebé komunidade okupa mak Eskola Báziku Sérgio Vieira de Mello, 10 Dezembru, Ensinu Báziku Filiál númeru 05 Komoro, Ensinu Báziku Sentrál 30 Agustu, Eskola Ensinu Sekundáriu Jerál 04 Setembru UNAMET Balide, EBC Bidau Akadiruhun, Eskola Sekundária Téknika Vokasional Indústria no Teknolojia Bekora no eskola sira seluk tan.
Jornalista: Osória Marques
Editór: Xisto Freitas da Piedade
