DILI, 13 Agostu 2025 (TATOLI)–Ministériu Edukasaun (ME) liuhusi Servisu Edukasaun Munisípiu Dili fó karta notifikasaun ba komunidade ne’ebé okupa arredór eskola bazeia ba númeru okupante.
Diretór Servisu Edukasaun Munisípiu Dili, Sabino Soares Pereira, informa, ME kontinua serbisu hamutuk ho Prezidente Autoridade Munisípiu (PAM) Dili no Sekretaria Estadu Terra no Propriedade (SETP) hodi notifika okupante sira ne’ebé okupa resintu eskola.
“Kona-ba notifikasaun, ami kuandu fó ba eskola sira, ami bazeia ba númeru okupante sira, katak okupante ne’ebé ho númeru boot, ami sei fó notifikasaun uluk. Ami sei kontinua serbisu ho PAM Dili no Terra Propriedade hodi hasai okupante sira ne’e hanesan ita hatene eskola rua mak rezolve ona, tuir mai ami sei haree ba eskola Akadiru-hun, notifikasaun to’o iha 15 Agustu ne’e, tuir mai mak Eskola Sergio Viera de Mello, notifikasaun iha 4 setembru,” Diretór hato’o ba Ajénsia TATOLI, Eskola Ensinu Sekundáriu Jerál (ESJ) Finantil, Aimutin, Kuarta ne’e.
Notísia relevante : SEATOU rona profesór sira-nia preokupasaun kona-ba komunidade hela iha arredór eskola
ME sei hasai okupante sira fazeadamente la’ós notifika dala-ida.
“Kona-ba programa Governu nian, liuliu atu hasai okupante husi arredór eskola ne’e, ami kontinua hala’o hanesan daudaun ami fó karta notifikasaun, maibé fazeadamente. Ami fó uluk ba okupante resintu eskola ne’ebé númeru boot, nune’e tun ba okupante ne’ebé ho uma-kain oituan,” nia akresenta.
Diretór konsidera atu garante kualidade edukasaun ba estudante sira, komunidade tenke kontribui hodi fó espasu ba eskola hodi hala’o prosesu aprendizajen.
“Ami hakarak garante kualidade edukasaun ba estudante sira, ne’ebé ami sei hasai komunidade husi resintu eskola atu estudante bele iha liberdade ba asesu prosesu ensinu aprendizajen iha eskola,” nia katak.
Antes ne’e, Diretór Eskola Sekundáriu Jerál 04 de Setembro Balide, Sérgio Alfredo da Cruz, husu atu ministériu fó ona karta notifikasaun ba okupante sira nune’e bele fó espasu ba eskola hala’o prosesu aprendizajen.
“Iha ne’e komunidade koopera ona atu sai, tanba sira hatene katak espasu ba eskola ne’e mós klo’ot no bainhira estudante sira hala’o ensinu aprendizajen, komunidade sempre halo movimentu bá-mai, maibé ami seidauk hetan karta notifikasaun husi Ministériu Edukasaun,” nia hateten.
Diretór Eskola rekorda, prosesu aprendizajen la’o ladun di’ak tanba hetan interompe maka’as husi komunidade ne’ebé okupa resintu eskola.
“Ami husu karta notifikasaun ne’e tanba arredór eskola sempre hetan movimentasaun bá-mai husi komunidade, eskola atu hala’o prosesu aprendizajen la di’ak, motór tama-sai, labarik sira fa’an sasán iha fali área eskola. Tanba ne’e se bele notifikasaun mai ona para sira bele prepara hamamuk fatin, husik espasu ba eskola hodi labarik sira hala’o prosesu aprendizajen ho di’ak no hakmatek,” Diretór rekomenda.
Enkuantu, eskola sira-ne’ebé Governu hasai ona okupante sira, tuir planu ME sei uza fali espasu sira ne’e hodi konstrui tan saladeaula, nune’e estudante sira bele hala’o prosesu aprendizajen.
Alende ne’e, sei harii mós kuziña ba merenda eskolár, biblioteka no seluk tan hodi fó espasu ba estudante sira asesu ba edukasaun ho fatin ne’ebé seguru.
Tuir dadus, resintu eskola sira ne’ebé mak komunidade kontinua okupa mak hanesan Eskola ESJ 04 de Setembro UNAMET Balide, Ensinu Báziku Filiál Sergio Viera de Mello, Ensinu Báziku Bidau Akadiru-Hun, Eskola Báziku Centrál 30 de Augostu no Eskola Sekundária Tékniku Vokasionál Indústria no Teknolojia Bekora.
Jornalista : Osória Marques
Editora : Julia Chatarina
