SEATOU rona profesór sira-nia preokupasaun kona-ba komunidade hela iha arredór eskola
DILI, 02 Juñu 2025 (TATOLI)—Ekipa husi Sekretaria Estadu Asuntu Toponímia no Organizasaun Urbana (SEATOU) rona preokupasaun profesór sira kona-ba komunidade hela iha arredór eskola bele afeta ba prosesu ensinu aprendizajen.
“Ita sei kontrola sidade laran tomak atu sai kabeer no moos ba ema hotu, aleinde estrada públiku sei haree mós ba komunidade ne’ebé hela iha arredór eskola. Ita sei hasai hotu tanba profesór sira kestiona katak komunidade hela iha arredorór eskola ne’e hakiak animál no barullu,” Sekretáriu Estadu Asuntu Toponímia no Organizasaun Urbana, Germano Santa Dias Brites, informa ba jornalista sira iha Kampung Baru, segunda ne’e.
Notísia relevante : ME notifika okupante ne’ebé okupa arredór eskola
Bazeia ba kondisaun ne’e, SEATOU hein hela despaisu husi Ministériu Edukasaun (ME) ba Ministériu Administrasaun Estatál (MAE) hodi hatun bá SEATOU hala’o serbisu.
“Hakarak ka lakohi komunidade ne’ebé okupa arredór eskola sei hasai hotu. Liuliu iha eskola EBC Akadiruhun no EBC 10 de Dezembru, entaun ida-ne’e mak alvu dahuluk ne’ebé ami sei hasai atu fila bá ida-idak nia orijen,” nia akresenta.
Sekretáriu Estadu Germano sei orienta ekipa konjunta hodi ba fó avizu ba okupante arredór eskola atu hamamuk fatin.
“Sasán no fatin Estadu ne’e Estadu nian hodi fó biban ba manorin-na’in sira atu hanorin estudante sira ho di’ak,” Governante ne’e katak.
Iha sorin seluk, Inspetora Jerál Gabinete Inspesaun Jerál iha ME, Maria Manuela Gusmão, haktuir, antes ne’e ekipa SEATOU hahú ona hasai komunidade iha eskola iha área Komoro.
Kestaun reklamasaun ba indenizasaun mak sai difikuldade ba ME bainhira atu hasai komunidade.
“Komunidade ne’ebé okupa eskola EBC Bidau ne’e uluk ami ko’alia ho antigu Ministru Edukasaun ne’e dehan bele de’it hasai, maibé komunidade hotu hakarak osan. Entaun ita atu ba foti osan iha ne’ebé. Eskola 4 Setembru mós komunidade okupa arredór eskola,” Inspetora tenik.
Antes ne’e, ME liuhusi Diresaun Servisu Edukasaun Munisípiu Dili notifika ona uma-kain 72 okupante arredór eskola iha Dili, kompostu husi uma-kain 52 okupa arredór ensinu báziku ho nia filiál sira no restante iha eskola ensinu sekundáriu jerál no tékniku vokasionál.
Jornalista : Alexandra da Costa
Editora : Julia Chatarina
