DILI, 09 Jullu 2025 (TATOLI)–Diretór Servisu Munisipál Jestaun Merkadu no Turizmu, Arthur Henrique informa okupante sira hamutuk uma-kain 13 ne’ebé durante ne’e okupa resintu Eskola Ensinu Sekundária Jerál (ESJ) 10 Dezembru, Komoro hamamuk ona eskola referida iha kuarta ne’e.
Responsavel ne’e dehan família 13 ne’e koopera tebes ho Governu no ohin ekipa Munisípiu Dili apoiu transporte hodi transporta ona sira bá Munisípiu Baukau.
“Kona-ba atividade agora ne’e, antes ne’e ami hahú halo ona aprosimasaun no diálogu liuhosi Autoridade Munisípiu Dili ho profesór, okupante no Diretór Servisu Edukasaun Munisípiu Dili nian, iha 09 Juñu liubá. Iha 19 Juñu, ami hasai notifikasaun ba okupante referidu,” nia dehan ba jornalista sira, iha resintu Eskola 10 Dezembru, Komoro, kuarta ne’e.
Nia haktuir katak iha diálogu ne’e okupante sira iha kooperasaun boot no sira rekoñese katak fatin ne’e resintu Estadu.
“Ohin família 13 ne’e kuaze família lima muda sai ona, hela 8. Maibé, ohin ne’e mós ami sei lori sai família rua bá Postu Administrativu Kelikai, Munisípiu Baukau. Família neen nafatin hela iha Dili (balun bá Hera no Metinaru),” nia esplika.
Arthur hateten Governu laiha indemnizasaun ba okupante sira iha territóriu ne’ebé okupa arredór eskola.
“Ami laiha indemnizasaun ba sira tanba ami halo ona diálogu katak sei laiha no tanba maiória mesak profesór. Sira-nia ezijénsia mak transporte, ne’ebé Autoridade Munisípiu Dili fó apoiu ona transporte ba sira,” nia tenik.
Notísia relevante : Okupante aredór EBC 10 Dezembru Komoro prontu koopera ho governu
Hafoin ida-ne’e, Arthur informa, aban (10/07) kontinua muda okupante uma-kain 12 iha arredór Konsellu Kombatente Libertasaun Nasionál iha Komoro no iha fulan-Agostu kontinua ba Suku Akadiruhun hodi muda uma-kain ualu ho ema 54, inklui mós iha arredór Eskola Sekundária 04 Setembru UNAMET Balide no iha eskola seluk iha Munisípiu Dili.
“Fó ona notifikasaun ba sira maibé ita-nia komunidade lakohi koopera. Maski nune’e, ami sei tun halo kolaborasaun ho autoridade lokál no seguransa hodi aproxima no hasai ho dignu,” nia esklarese.
Nia solisita okupante sira hotu ne’ebé okupa arredór eskola atu koopera no kolabora ho autoridade kompetente atu hamamuk fatin para fó livre ba estudante sira hodi hala’o prosesu aprendizajen ho di’ak.
Entretantu, okupante Domingos Guterres Belo husi Munisipiu Baucau hateten sira prontu sai husi fatin referidu tanba sira okupa arredór eskola nian no sira mós hakarak kontribui ba dezenvolvimentu iha rai-laran liuliu iha setór edukasaun.
Nia haktuir katak família 13 ne’e hela iha arredór eskola durante tinan-10 resin ona, hahú kedas husi tinan 2006 no 2007.
“Ami la hetan indimnizasaun ka fatin husi Governu maibé sira (Governu) ajuda de’it ami hodi tula ami no ami-nia sasán bá idak-idak nia munisípiu,” nia katak.
Abitante ne’e rekomenda ba nia maluk sira seluk ne’ebé okupa hela eskola atu iha konxiénsia sai husi fatin eskola nian.
Iha parte seluk, Xefe Suku Fatuhada, Marcelino Soares dehan autoridade kompetente muda okupante sira tanba okupa patrimóniu Estadu.
Nia subliña katak konkordánsia entre okupante ho Autoridade Munisípiu Dili katak muda mak okupante sira no sobu sasán, más uma ne’ebé durante ne’e okupante sira okupa ne’e sei pertense ba patrimóniu Estadu.
Autoridade lokál ne’e apela ba komunidade katak resintu eskola ne’e fatin aprendizajen, la’ós fatin atu hela.
Jornalista : Osória Marques
Editora : Julia Chatarina
