Loron Nasionál Juventude selebra ho atividade desportu no kultura
DILI, 06 Novembru 2026 (TATOLI)–Selebrasaun Loron Nasionál Juventude tinan ne’e sei hahú hala’o iha Sábadu (07 Novembru) to’o Kuarta (12 Novembru 2026) ho atividade oioin ne’ebé envolve juventude sira.
Diretór Jerál Juventude iha Ministériu Juventude, Desportu, Arte no Kultura (MJDAK), Mário Tilman, hateten atividade sira-ne’e prepara atu valoriza espíritu juventude 12 Novembru nian liuhusi asaun kriativu, desportu no kultura.
“Atividade sira-ne’e, ita prepara atu juventude sira bele aprende, kompete nomós hanoin hikas sakrifísiu Loriku Asswa’in sira-nian,” Mário Tilman hateten ba jornalista sira iha Edifísiu MJDAK, ohin.
Tuir ajenda, iha loron Sábadu (07/11), sei iha abertura ofisiál ba espozisaun artezenatu, doasaun raan no kalan kulturál.
Iha loron Domingu (08/11), sei iha atividade Marsa Saudavel, kompetisaun marsa unidu, kompetisaun poezia, kompetisaun koru no diskursu públiku.
“Ho abertura ne’e ita hakarak hatudu katak juventude la’ós de’it partisipa maibé sai mós autór ba atividade sira,” nia dehan.
Iha loron Segunda (09/11), sei iha atividade limpeza jerál, kompetisaun halai taru bero, kompetisaun tutur sanan rai, kompetisaun marsa unidu, kompetisaun Fashion Show, kompetisaun koru no sihir (batuki).
Iha loron Tersa (10/11), sei iha atividade semináriu nasionál, Grande Finál kompetisaun Poezia, Grande Finál diskursu públiku, Grande Finál kompetisaun koru no Grande Finál kompetisaun Fashion Show traze tradisionál.
Mário Tilman hateten, semináriu nasionál ne’e importante atu juventude sira diskute kona-ba sira-nia papél iha dezenvolvimentu sustentável.
“Semináriu ne’e espasu ba juventude sira atu ko’alia no fó sira-nia hanoin ba futuru nasaun nian,” nia dehan.
Iha loron Kuarta (11/11), sei iha atividade Painel Diskusaun, Kalan Reflesaun, kesi ai-fuan no loke filme dokumentáriu no kalan kulturál.
“Kalan reflesaun ne’e atu juventude sira hanoin hikas sakrifísiu Loriku Asswa’in sira-nian. Sira-nia mate mak ita-nia moris ohin loron,” Mário Tilman hateten.
Enkuantu iha loron Kinta (12/11), sei iha misa agradesimentu, kari ai-funan iha semitériu, dada undian ba siklista sira, distribuisaun prémiu ba manan-na’in sira, dada rifa ba munisípiu implementadór, konsertu no enserramentu.
“Ita hakarak enserra selebrasaun ne’e ho agradesimentu no ho espíritu unidade. Juventude sira mak futuru, tanba ne’e husu atu aproveita oportunidade ne’e hodi hasa’e kapasidade,” nia dehan.
Jornalista : Hortêncio Sanchez
Editór : Cancio Ximenes
