BOBONARU, 01 Outubru 2025 (TATOLI)-Ministériu Edukasaun (ME) simu relatóriu husi superintendente no inspetór eskolár sira katak taxa absentismu (falta) manorin no kanorin iha aula rejista aas iha munisípiu Bobonaru.
Ministra Edukasaun, Dulce de Jesus Soares, afirma ME hola ona inisiativa atu toma atensaun ba problema ne’e, tanba bainhira estudante falta barak sei la aproveita di’ak ekipamentu eskolár ne’ebé Governu prepara no profesór mak falta, eskola konserteza abandona alunu sira ne’ebé hakarak partisipa iha ensinu no aprendizajen.
“Kada eskola, profesór falta dala hira iha fulan ida, alunus falta dala hira iha fulan ida, ita hakarak fó sai ba komunidade, nune’e ema hotu hatene. Ita sei la fó sai naran, maibé ita fó sai tanba edukasaun ne’e la’ós Ministeriu Edukasaun nia responsablidade de’it, edukasaun responsabilidade komunidade edukativa nian”, Dulce de Jesus hateten durante partisipa diálogu eskolár ho estudante sira iha Bobonaru ne’ebé realiza iha Zinájiu Maliana.
Governante ne’e subliña katak ME hola medida ne’e tanba profesór nia knaar mak atu prepara alunu sira enfrenta sira-nia futuru sai di’ak no nabilan.
Atu redús problema estudante no profesór sira falta iha eskola, ministra dehan daudaun Edukasaun mós rekolla lista prezensa alunu no manorin sira iha kada fulan. “Ami halo para troka disiplina, husu superintendente ho inspetór eskolár durante fulan ida ne’e foti alvu ba profesór no alunu 100-resin, kuandu falta sein justifikasaun dala-tolu, ita enkamiña informasaun ne’e ba Komisaun Funsaun Públika atu hola medida tuir lei”, afirma.
Superintendente Edukasaun Munisípiu Bobonaru, Noémia Antónia, konfirma katak iha Setembru ne’e rejista manorin 100 mak komete infrasaun disiplinár, kompostu husi postu administrativu Maliana na’in-18, Atabae 28, Lolotoe 31, Bobonaru 12 no Balibó ida.
Irregularidade hirak ne’e Edukasaun Bobonaru rejista liuhusi auto ka formatu ne’ebé dirijente eskola sira prienxe bainhira sujeita ba kometete infrasaun.
“Se sira nafatin [falta] ita fó auto ba sira prienxe. Se sira muda ona, ita agradese, auto ne’e ita arkiva iha munisípiu. Se sira komete nafatin prienxe auto dala-tolu, ita submete ba Komisaun Funsaun Públika atu foti medida tuir lei, bele ko’a nia saláriu, depende grau ne’ebé nia komete”, katak.
Notísia relevante: Edukasaun Bobonaru sei halo auditoria ba ezekusaun orsamentu PME iha EBF Lebos
Jornalista: Sergio da Cruz
Editora: Maria Auxiliadora
