Pesoal Saúde Vikeke sanulu konkorre vaga bolsa estudu iha área espesialista, na’in-ida pasa
VIKEKE, 01 Outubru 2025 (TATOLI)—Diretór Servisu Saúde Munisípiu Vikeke, Aljacsono S. Maia informa médiku Munisípiu Vikeke hamutuk na’in-sanulu (10) konkorre vaga bolsa estudu iha área espesialista ne’ebé Ministériu Saúde (MS) loke, maibé iha na’in-ida de’it mak pasa hodi kontinua hala’o estudu iha Kuba.
“Ha’u apresia tebes ba Ministra Saúde no Vise Ministru ho nia ekipa juri ba vaga bolsu estudu espesialista nian ne’ebé MS loke ba médiku timoroan sira. Husi Vikeke médiku na’in-sanulu (10) mak konkorre maibé iha prosesu selesaun na’in-ida mak pasa,” Aljacsono S. Maia hateten ba jornalista sira iha ninia kna’ar fatin, Vikeke fatin, Kuarta ne’e.
Nia dehan vaga bolsa estudu ne’e ekipa juri hala’o ho transparénsia, la haree ba kór no partidária, maibé haree liu ba ema-nia koñesimentu no preparasaun dokumentu sira.
Aljacsono enkoraja médiku Servisu Saúde Munisípiu Vikeke sira-ne’ebé la pasa nafatin halo preparasaun atu konkorre fali iha futuru.
Aleinde ne’e, nia hatutan, tinan oin Munisípiu Vikeke hahú halo konstrusaun ospitál munisipál, entaun presiza médiku espesialista hodi fó atendimentu ba populasaun sira iha Vikeke.
Jornalista: Vitorino Lopez da Costa
Editór: Xisto Freitas da Piedade
