DILI, 01 Outubru 2025 (TATOLI)–Tribunál Judisiál fó sai akordaun, Kuarta ne’e, hodi kondena arguidu JS ho pena prizaun efetivu tinan-ualu no pena prizaun efetivu tinan-sia ba arguidu DM tanba faktu provadu katak arguidu na’in-rua iha indísiu forte envolve iha krime omesidu ne’ebé halakon Bernadino Ximenes Brito nia vida iha área Luru-Mata, Suku Fatuhada, Postu Administrativu Dom Aleixo Munisípiu Dili, iha 13 Maiu 2023.
Kazu ne’e hahú husi konfrontu entre joven sira, nune’e rezulta Bernadino Ximenes Brito lakon vida.
Tribunál liuhusi julgamentu ba prosesu, haree faktu sufisiente atu kondena arguidu na’in-rua DM no JS ho pena efetivu tanba provadu envolve iha krime ómesidu.
Kazu omesidu envolve arguidu na’in-ualu, maibé iha leitura akordaun ne’e, Tribunál konsidera katak iha arguidu na’in-rua ho inisiál DM no JS maka iha indísiu forte hodi envolve iha kazu referidu.
Ho nune’e, iha leitura akordaun ne’e, Juíz koletivu deside hodi aplika pena prizaun efetivu tinan-ualu ba arguidu JS no tinan-sia ba arguidu DM.
Iha sala julgamentu, Juíz kolletivu mós pronúnsia iha nia desizaun katak aplika pena suspensaun ba arguidu JSS, LA, TA, no FA.
Notísia relevante : Kazu Loromata, KRAM bolu urjente líder PSHT no Federasaun Wushu
Enkuantu, tribunál deside absolve totál EG no MS husi krime ne’ebé Ministériu Públiku (MP) imputa ba sira tanba konsidera laiha indísiu sufisiente, katak durante iha faze produsaunprova inklui depoimentu sira ne’ebé testamuña sira aprezenta durante julgamentu ba kazu arguidu sira ne’e la envolve iha kazu omesídiu ne’ebé halakon Bernardino Ximenes Brito nia vida.
Hafoin Juíz koletivu lee sai tiha leitura akordaun ne’e, Tribunál mós fó hanoin atu bainhira arguidu sira la konkorda ho desizaun Tribunál nian, bele lihusi sira-nia defeza hodi halo rekursu hodi kontesta ba desizaun Tribunál Primeira Instánsia Dili iha prazu loron-30 nia laran, sura husi loron ne’ebé Tribunál notifika desizaun ba defeza.
Iha sala julgamentu, Defeza husi Arguidu DM, Advogadu Privadu Arlindo Sanches dehan, nia parte sei halo rekursu.
“Hanesan defeza ba iha arguidu DM ne’ebé hetan kondenasaun husi Tribunál, defeza sei prepara hodi halo rekursu,” nia deklara.
Arguidu ba iha kazu n’ee hamutuk na’in-ualu no antes ne’e iha prosesu Primeiru Interrogatóriu ba arguidu DM, JS, FA no LA mak kumpre Prizaun Preventiva no arguidu EG, MS, JSS, LA, TA, FA maka kumpre medida Termu Indentidade Rezidénsia (TIR).
Prosesu ne’e, prezide husi Juíz koletivu, Afonso Carmona, Albertina Neves, Maria Solana, Ministériu Públiku reprezenta husi Prokuradór Adérito Tilman, arguidu sira hetan asisténsia legál husi Advogadu Privadu, no Defensór Públiku.
Jornalista : Natalino Costa
Editora : Julia Chatarina
