BOBONARU, 02 Outubru 2025 (TATOLI) – Superintendente Eskolár, Diresaun Servisu Munisipál Edukasaun Bobonaru (DSMEB), Noémia António, apela ba fornesedór sira atu prepara ai-han tuir menú ne’ebé estipula iha matadalan Program Merenda Eskolar, nune’e bele hadi’ak estudante sira-nia nutrisaun.
Noémia fó apelu ne’e bazeia ba rezultadu inspesaun husi inspetór eskola sira, ne’ebé identifika katak iha eskola, fornesedór sira halo preparasaun ba ai-han la tuir menú.
“Ezemplu iha EBC Katólika Padre Manuel Luís fornesedór sira fornese hahán ba labarik sira kuaze etu ne’e tomak de’it, labarik sira ladún han, foos ne’e bokar boot, modo ne’e koto kahur mostarda. Dalaruma iha na’an, maibé ki’ikoan liu. Ha’u fó hatene kedas ba fornesedór sira katak bainhira atu te’in buka jeitu oinsá para atrai labarik sira gosta han. Se ita-boot sira te’in hanesan ne’e, hahán sira ne’e estraga de’it. Atu hadi’ak labarik nia nutrisaun oinsá?”, nia lamenta.
Bainhira fornesedór sira kontinua la muda maneira, DSME Bobonaru sei foti sansaun rigoroza hapara no troka fornesedór seluk.
Nia dehan dadus husi Ministériu Saúde hatudu maski implementasaun merenda eskolár regularmente, maibé má nutrisaun kontinua rejista aas iha Bobonaru.
“Ha’u husu atu prepara hahán ho nutrisaun kompletu. Hahán ne’ebé fó forsa, fó buras no ne’ebé fó protesaun. Tanba, baibain ami observa, sira fó hahan fó forsa hanesan etu mak barak liu, maibé modo, ai-fuan ne’e nia kuantidade seidauk to’o”, dehan.
Tuir dadus husi Diresaun Servisu Edukasaun Munisípiu Bobonaru, estudante ne’ebé asesu ba Programa Merenda Eskolár 2025 hamutuk na’in-29.078 husi Ensinu Báziku no Pré-Eskolár Públiku hamutuk 26.516 no Ensinu Báziku no Pré-Eskolár Katólika 2.562.
Programa ne’e implementa iha eskola públika hamutuk 179, ne’ebé kompostu husi Ensinu Báziku hamutuk 137 mak hanesan Ensinu Báziku Sentrál (EBC, sigla portugés) 23 no Ensinu Báziku Filiál (EBF) 114, Ensinu Pré-Eskolár 32, Ensinu Báziku no Ensinu Pré-Eskolár Katóliku 24, kompostu husi EBC neen, EBF 10, no Ensinu Pré-Eskolár Katóliku ualu.
Totál orsamentu PME tinan 2025 ne’ebé Autoridade Munisípiu Bobonaru aloka hamutuk $1,758,783,60, no ho montante ne’e fahe ba Ensinu Báziku públiku no katóliku hamutuk $1,564,829,28 ho totál loron efetivu 141, no Pré-Eskolár Públiku no Katólika hamutuk $193,954,32 ba loron efetivu hamutuk 174.
Notísia relevante: Edukasaun Bobonaru sei halo auditoria ba ezekusaun orsamentu PME iha EBF Lebos
Jornalista: Sergio da Cruz
Editora: Maria Auxiliadora
