Governu Austrália entrega ekipamentu téknikál ba MI apoia Servisu Migrasaun
DILI, 02 Outubru 2025 (TATOLI)–Governu Austrália liuhusi Primeira Sekretaria Australian Border Force (ABF), Inspetora Sarah Body no-mós George Kpakima, nu’udar Primeira Sekretaria no Adidu Migrasaun Australia ba Timor-Leste, entrega ekipamentu teknikál ba Ministériu Interior (MI) hodi apoia Diresaun Jerál Servisu Migrasaun.
Ekipamentu hirak ne’e mak hanesan ekipamentu ezaminasaun dokumentu (magnifiers, Doculus Lumus), gravadór, kamera dijitál, hard drive, tableta Samsung, relojiu dijitál, kaixa rai osan, tinteiru ba imprime viza nian, adaptador USB no ekipamentu eskritóriu ba postu fronteira sira.
Diretora Jeral Servisu Migrasaun, Superintendente Asistente Polisia Adelaide da Rosa, hateten nia parte ofisialmente simu ekipamentu sira husi Forsa Fronteira Austrália hanesan parte ida husi kooperasaun hodi haforsa jestaun fronteira no hametin seguransa nasionál.
“Ekipamentu sira-ne’e sei uza iha Aeroportu, Portu no Postu Fronteira sira hodi detekta dokumentu viajen nian no ekipamentu ida-ne’e sei ajuda di’ak liutan servisu migrasaun halo kontrolu iha Aeroportu, Portu no Postu Integradu Fronteira sira,” Adelaide da Rosa hateten iha sede sentrál Servisu Migrasaun iha Ministériu Interiór, Vila-Verde, ohin.
Nia dehan, ho ekipamentu sira-ne’e sei ajuda membru sira servisu maka’as hodi kombate krime no tráfiku umanu husi autór rede krime organizadu sira.
“Antes ita entrega ba membru sira ita sei fó treinamentu ba sira tanba Governu Australia mós sei fó formasaun hodi kapasita ajente no ofisiál Migrasaun sira, oinsa utiliza ekipamentu sira-ne’e. Iha ne’e liuliu ba Xefi Postu Aeroportu no fronteira sira, atu nune᾽e bele fasilita servisu ne᾽ebe mak di᾽ak ba pesoál sira bainhira halo kontrolu ba ema sira tama sai iha liña fronteira Timor-Leste,” Adelaide hateten.
Entretantu, Inspetora Sarah Body, sente kontente ho kooperasaun ida-ne’e hodi bele ajuda Governu Timor-Leste servisu maka’as hodi kombate krime no tráfiku umanu husi autór rede krime organizadu sira.
“Ami kontente tebes servisu hamutuk ho Servisu Migrasaun hodi hametin fronteira iha rejiaun ida-ne’e nakait ba seguransa nasionál liuliu krime transnasionál. No, apoiu ekipamentu ida-ne’e fasil atu uza ba servisu nian hanesan haforsa Servisu Migrasaun liuhusi Sistema Informasaun hodi garante jestaun fronteira ida-ne’ebé di’ak iha postu migrasaun sira-ne’ebé instala ona iha territóriu nasionál,” nia dehan.
Nia hatutan, apoiu ida-ne’e hanesan interese koletivu atu promove kooperasaun di’ak hodi mellora kapasidade servisu migrasaun hadi’a sistema jestaun fronteira.
“Ida-ne’e ekipamentu teknikál ho nia funsaun para atu identifika pasaporte falsu sira. Ami uza ida-ne’e iha aeroportu ne’ebé boot iha Austrália. Ida-ne’e ajuda ita iha aeroportu liuhusi watermark sira-ne’ebé bele halo ita deskonfia. Se deskonfia ona bele identifika kedas hanesan evidénsia ida,” nia hateten.
Reprezentante Governu Austrália ne’e afirma, apoiu ba Diresaun Jerál Servisu Migrasaun hanesan esforsu ida hodi kombate krime tanba migrasaun mak hanesan autór prinsipál sira-ne’ebé responsabiliza ba jestaun movimentu ema-nian iha nasaun kiik ida-ne’e.
Jornalista : Hortencio Sanchez
Editór : Cancio Ximenes
