DILI, 02 Outubru 2025 (TATOLI)–Komandu Polísia Nasionál Timor-Leste (PNTL) dezarma no suspende funsaun husi membru Korpu Seguransa Pesoál (CSP, sigla portugés) ida, tanba suspeitadu fasilita kilat ba xineza ida hodi halo treinamentu tiru iha área Kaitehu, Munisípiu Likisá.
Membru CSP ne’e daudaun la fó ona eskoltu ba Diretór Servisu Nasionál Intelijénsia, Longuinhos Monteiro no filafali ba nia Unidade Espesiál Polísia (UEP) iha Bairru Pité hodi submete ba investigsaun.
Kazu ne’e prosesa ona iha Ministériu Públiku (MP) ho NUC : 0313/25.PNSIC.
Portavós interinu PNTL, Asistente Superiendente Polísia Moizinho Coreia rekoñese katak, iha duni membru CSP ne’ebé fó kilat ba xineza ida hodi tuir treinu tiru.
“Ha’u hanoin loos duni katak virál iha rede sosiál, iha vídeo ida-ne’ebé deskonfia katak iha envolve membru seguransa pesoál ida husi PNTL ne’ebe fó arma ba sidadaun estranjeiru balun hodi tiru,” Portavós Polísia hateten ba Jornalista sira, iha Ministeriu Interiór , Vila-Verde, Kinta ohin.
Notísia relevante : Tribunál Suai aplika TIR ba timoroan lori kilat-musan ultrapasa fronteira
Nia dehan, Komandu PNTL toma ona atensaun hodi foti medida loke prosesu investigasaun kriminál no displinar hasoru membru CSP ne’e.
“Prosesu la’o hela, sé sé mak envolve ita sei haree, pelumenus semana oin hanesan ne’e bele update, ami bele update ba ita-boot sira,” nia akresenta.
Mouzinho dehan, Komandu PNTL mós sei halo mós investigasaun ba xineza inklui Diretór SNI, Longuinho Monteiro.
“Kuandu prosesu la’o ne’e, sé sé deit mak hola parte iha krime ida, klaru katak Komandu PNTL sei bolu hotu hodi halo investigasaun. Tanba ne’e, bainhira konklui sei haruka ba Ministériu Públiku,” nia informa.
Iha fatin hanesan, Diretór Departamentu Servisu Investigasaun Kriminál (DSIK) Superiendente Polísia João Belo hateten, kazu ne’e sei dezenvolve tanba sai ona konsumu públiku.
“Ba ida-ne’e Komandu foti ona medida halo ona suspensaun ba nia, hodi hein submete ba prosesu investigasaun kriminál. Iha parte seluk, krime nian mós ami halo ona investigasaun no ohin aprezenta ona ba iha Ministériu Públiku,” nia katak.
Nia dehan, Komandu PNTL foti medida suspensaun ba membru CSP ne’e la tama serbisu durante loron-30 hodi hein submete ba prosesu investigasaun kriminál.
“Ita mós sei husu responsabilidade ba Longuinho Monteiro, tanba saida mak nia orienta halo ida-ne’e, ita sei ke’e kle’an,” nia katak.
Ho akontesimentu ne’e, Komandu PNTL deside foti hotu arma sira ne’ebé utiliza husi membru CSP hodi fó ba xineza ida treinu tiru.
“Membru ne’e agora iha de’it uma durante loron-30 nia laran hodi submete ba prosesu kriminál, agora ita halo suspensaun ba nia. Ha’u hanoin regra utiliza kilat klaru, tanba ne’e ida-ne’e ami konsidera infrasaun,” nia hato’o.
Tuir informasaun ne’ebé Ajénsia TATOLI rekolla iha terrenu, situasaun ne’e akontese iha loron 15 Setembru 2025, ne’ebé membru CSP ho inisiál MTJ ho deviza fó kilat boot ho tipu MP5 no pistola Glock 19 ba xineza ida hodi halao treinamentu tiru.
Jornalista : Natalino Costa
Editora : Julia Chatarina
