DILI, 02 Outubru 2025 (TATOLI)-Komisaun C iha Parlamentu Nasionál ne’ebé trata Asuntu Finansa Públika sei aprezenta proposta hodi hasai orsamentu kuaze millaun $5 ne’ebé prevee iha Proposta Orsamentu Jerál Estadu (OJE) 2026 ba eis-titulár sira hodi aloka fali ba iha setór produtivu.
Prezidente Komisaun C, Cedelízia Faria dos Santos, dehan Lei Pensaun Mensál Vitalísia hetan ona promulgasaun, nune’e bainhira diskusaun proposta Lei OJE 2026 sei aprezenta proposta hodi hasai tiha verba ne’ebé Governu kontinua prevee.
“Iha posibilidade rua, hasai hotu tiha hodi redús ona montante OJE. Maibé, preokupasaun pertinente husi ita-nia alin estudante sira-nia rekomendasaun katak osan ne’e aloka fali ba setór produtivu”, deputada dehan ba Tatoli iha Parlamentu, ohin.
Tanba Parlamentu iha direitu no kompeténsia atu halo proposta hodi bele hasai verba ne’e.
Antes ne’e, Ministra Finansa, Santina Cardoso, dehan verba orsamentu ne’ebé prevee ba eis-titulár sira sei kontein hela iha proposta OJE 2026, tanba verba ida-ne’e sei aprezenta ba PN mak foti desizaun.
Ministériu Finansa iha 01 Outubru submete ona proposta lei OJE 2026 ho montante billaun $2,291 ba PN.
Lembra katak, PN liuhusi reuniaun plenária estraordinária, iha 26 Outubru, aprova projetu lei númeru 11/VI(3a) Revoga Pensaun Mensál Vitalísia ba Deputadu no Eis-Titulár Órgaun Soberania no Providénsia sira seluk iha finál globál ho votu a favór 62, kontra no abstensaun 0.
Notísia relevant:https://tatoli.tl/2025/09/30/ministra-finansa-orsamentu-ba-eis-titular-sei-kontein-iha-proposta-oje-2026/
Jornalista: Nelson de Sousa
Editora: Maria Auxiliadora
