DILI, 02 Outubru 2025 (TATOLI)-Komisaun C iha Parlamentu Nasionál ne’ebé trata Asuntu Finansa Públika prepara ona kalendáriu diskusaun ba proposta Orsamentu Jerál Estadu (OJE) 2026.
Prezidente Komisaun C, Cedelízia Faria dos Santos, dehan normalmente proposta lei OJE ne’e Governu submete ona ba meza Parlamentu hafoin iha plenária sei baixa ba Komisaun.
Tuir ezbosu kalendáriu Komisaun nian, iha Outubru nia laran komesa halo ona audiénsia públika ho liña ministeriál sira. “Diskusaun iha plenária faze jeneralidade hahú husi loron 5 até 7 Novembru, kontinua ba espesialidade durante semana rua. Ami nia previzaun 26 Novembru aprova ona iha finál globál hodi haruka ba Prezidente Repúblika bele halo promulgasaun”, nia hateten ba Tatoli iha Parlamentu, ohin.
Nia dehan, OJE 2026 iha redusaun kuaze 5% kompara ho OJE 2025. “Tuir ami nia haree, ne’e di’ak ona, tanba aumenta mak ita preokupa ho Fundu Mina-rai ne’ebé komesa redús”, salienta.
Prezidente Komisaun ne’e lamenta ho ezekusaun OJE 2025 ne’ebé seidauk atinje 50%. Tuir Komisaun, ezekusaun verba iha kapitál dezenvolvimentu sei ki’ik, liuliu orsamentu boot tau iha Fundu Infraestrutura. Tanba ninia prosesu naruk no loke Konkursu públiku, vistu préviu Tribunál, kontratu no seluk tan.
Aleinde ne’e, iha transferénsia públika alokasaun boot atu selu pensaun veteranu rejistadu 2009, maibé tuir ministériu tutela sei halo pagamentu iha Dezembru mak ninia ezekusaun sei aumenta.
“Ba fundu rezerva seguransa sosiál tau la’ós ezekuta, maibé atu halo kapitalizasaun hodi bele hetan funan”, katak.
Hodi solisita atu liña ministériu sira ezekuta orsamentu ne’ebé aloka ona ho di’ak hodi hadi’a povu nia moris no rekomenda atu ezekuta tuir planu no halo kalendáriu ezekusaun.
Lembra katak Ministériu Finansa (MF) iha loron 01 Outubru ne’e submete ona proposta lei OJE ba tinan fiskál 2026 ho montante billaun $2,291 ba PN.
Tuir Portál Transparénsia Ministériu Finansa, ezekusaun OJE 2025 ho orijen $2,617,138,274, kompromisu $92,185,525.50, obrigasaun sira $102,135,153.65, atuál $1,164,750,006.36, saldu $1, 258,067,588.49 no ezekusaun 48.4%.
Notísia relevante: https://tatoli.tl/2025/10/01/governu-aprezenta-ona-proposta-lei-oje-2026-ba-parlamentu-nasional/
Jornalista: Nelson de Sousa
Editora: Maria Auxiliadora
