BOBONARU, 02 Outubru 2025 (TATOLI)-Ministériu Planeamentu no Investimentu Estratéjiku (MPIE), liuhusi Diresaun-Jerál Ordenamentu Territóriu no Diresaun Nasionál Planeamentu Urbanu, formaliza establesimentu Grupu Traballu Munisipál (GTM) ba projetu Planu Uso de Solo Urbano (PUSO) iha postu administrativu Maliana, munisípiu Bobonaru.
GTM mak grupu ne’ebé forma husi reprezentante Governu, autoridade munisipál, tékniku sira no líder komunitáriu sira ho objetivu atu akompaña no apoia prosesu elaborasaun planu, halo koordenasaun interinstitusionál, fasilita partisipasaun komunitária, organiza reuniaun no konsulta no garante prosesu ne’ebé transparénsia, inkluzivu, koordenadu ho objetivu planeamentu ne’ebé sustentavel.
“Grupu Traballu Munisipál ne’e mak ita atu kria kuadru akompañamentu ba projetu elaborasaun Planu Uso de Solo Urbano Maliana”, Diretora Nasionál Planeamentu Urbanu, Grace Natália Lopes de Carvalho, informa iha salaun Maria Tapó, Maliana.
Bazeia ba termu referénsia, períodu elaborasaun PUSO ho durasaun fulan ualu, hafoin ne’e mak sei bele determina programa ne’ebé atu implementa iha tempu kurtu, médiu no longu prazu.
Importánsia husu PUSO ne’e rasik, dirijente ne’e esklarese katak Governu hakarak prodús dukumentu ida ne’ebé hatuur regra no norma ba uzu okupasaun rai nian.
Aleinde ne’e, vatanjen husi planu ne’e rasik mak prodús ordenamentu ne’ebé organizadu no sei iha ordenamentu territoriu ne’ebé di’ak no sei garante dezenvolvimentu sidade nian ne’ebé sustentavel, integradu, no sei iha armoniozu ba iha Uzu Okupasaun no Tranformasaun rai.
“Ita iha ona dokumentu Planu Nasionál Ordenamentu Territóriu, ita mós iha ona Planu Munisipál Ordenamentu Territoriu no mós atu kontinua halo intervensaun ba iha uzu okupasaun rai nia, ita tenke iha regra ka norma. Ida-ne’e ita sei prodús husi ita-nia dukumentu Planu Uso de Solo Urbano Maliana ka sidade sira seluk ne’ebé define husi Planu Munisipál”, dehan.
Sekretáriu Autoridade Munisipál Bobonaru ba Asuntu Planeamentu no Dezenvolvimentu Integradu, Semdo Laco, husu ba GTM atu fó kontribuisaun másima ba eleborasaun planu, nune’e ba futuru sidade Maliana bele sai di’ak, furak no organizada.
“Ita-boot sira-nia papél no responsablidade ne’e importante, tanba hatene kondisaun sidade Maliana. Tuir loloos planu urbanu ne’e iha antes para uma ka uza rai tuir saida mak hatuur iha planu ne’e. Más depois tinan 20-resin buat hotu hatuur ona iha rai nia leten. Ba futuru iha buat balu ke presiza ita sobu para hadi’ak. Se planu ne’e implementa la ho di’ak, ita sei la muda buat ida, entaun tenke fó apoia katak Maliana ne’e ba futuru hakarak sai hanesan, tanba sidade agora kloot no sabraut”, afirma.
GTM Planu Uso de Solo Urbano Maliana envolve ema na’in-38, kompostu husi dirijente no funsionáriu servisu munisipál, delegasaun territoriál, autoridade postu administrativu Maliana no xefe suku sira.
Aktividade ne’e realiza durante loron rua no tuir ajenda, aban sei kontinua halo avaliasaun ba servisu konsultóriu nia ba projetu elaborasaun Planu Uso de Solo Urbano Maliana.
Konsultóriu ba projetu ne’e mak Amitas no Wisa Karma husi Indonézia.
Notisía relevante: MPIE diskute ho autoridade postu kona-ba elaborasaun PMOT iha Suai
Jornalista: Sergio da Cruz
Editora: Maria Auxiliadora
