DILI, 02 Outubru 2025 (TATOLI) – Diretór-Jerál Sekretaria Estadu Kooperativa (SEKoop), Olderico Lopes, informa katak rezultadu peskiza ne’ebé SEKoop ho empreza Bali Honey Madu halo hatudu munisípiu lima iha poténsia ba atividade apikultura (kultivu no prodús bani).
Peskiza ne’ebé halo ne’e ho objetivu atu hatene loloos posibilidade atu halo apikultura, tanba bani-been ne’e depende ba ai-funan saida mak bele ajuda prodús bani-been.
“Foin lalais halo peskiza ne’e ba munisípiu Ermera, Likisá, Aileu, Manatutu no Bobonaru, rezultadu hatudu munisípiu lima ne’e viavel hotu atu halo kultivasaun ba bani hodi prodús bani-been iha futuru”, Olderico Lopes dehan Tatoli iha nia knaar fatin, ohin.
Nia hatutan katak empreza Bali Honey Madu lori ona rezultadu sira ne’e bá Indonézia halo estadu kle’an sobre saida mak sira atu halo iha etapa tuirmai.
Nia esplika planu ne’ebé atu halo iha etapa tuirmai mak hahú tama ona ba kultivasaun ninian, nune’e iha fulan ida-ne’e nia klaran membru na’in-ualu husi kooperativa munisípiu lima ne’e sei bá Bali halo estudu komparativu hodi hetan esperiénsia, nomós vizita fatin sira ne’ebé haki’ak bani ne’e.
“Sira fila hahú implementa iha 2026. Tanba Empreza Bali Honey dehan Timor-Leste iha poténsia ba bani-been ne’e tonelada barak, maibé seidauk hatene mekanizmu kolleta. Ho kooperasaun ne’ebé iha sira kompromete atu ajuda Timor-Leste, hahú haki’ak, prodús to’o packaging”, dehan.
Lembra katak, iha loron 16 Setembru 2025, SEKoop asina nota entendimentu (MoU) ho empreza Bali Honey Madu husi Indonézia atu halo peskiza bá fatin potensiál sira atu haki’ak bani.
Sekretáriu Estadu Kooperativa, Arsénio Pereira, hateten asinatura akordu ne’ebé parte rua halo ne’e bolu A Letter of Agreement (LoA) ne’ebé empreza mai atu halo peskiza boot ida hodi haree Timor-Leste nia potensialidade ne’ebé mak bele haki’ak bani.
Jornalista: Arminda Fonseca
Editora: Maria Auxiliadora
