Sirkuitu eletrisidade rezulta ahi han uma iha Suku Bahalarauain
VIKEKE, 02 Outubru 2025 (TATOLI)—Sirkuitu eletrisidade rezulta ahi han mutuk uma ida no koziña inklui sasán uma laran la salva iha Aldeia Wetalitua, Suku Bahalarauain, Postu Administrativu Vikeke Vila, Munisípiu Vikeke.
Xefe Gabinete Jestaun Risku Dezastre Naturál husi Autoridade Protesaun Sivíl (APC-sigla portugeza) Munisípiu Vikeke, Eugenio Guterres haktuir akontesimentu inséndiu ne’e APC Munisípiu Vikeke halo ona verifikasaun ba uma-kain afetadu.
“Akontesimentu inséndiu ne’e iha 30 Setembru, kauza husi sirkuitu eletrisidade liuhusi fiu metan ne’ebé liga bá uma. Husi ne’e mak ahi alastra ba uma no koziña ahin han moos hotu,” Eugenio Guterres ba TATOLI iha Wetalitu, Kinta ne’e.
Eugenio hatutan akontesimentu inséndiu ne’e parte APC apoia ona pakote emerjénsia no la’ós ai-han ba família afetadu.
Ho akontesimentu ne’e, nia husu komunidade iha Munisípiu Vikeke atu fó-atensaun ba ahi eletrisidade no di’akliu taka kontadór iha meiudia nune’e labele akontese ahi han uma.
Iha fatin hanesan, eis Delegadu Aldeia Wetaliatua, Nazarinho Soares relata vítima ba inséndiu ne’e ema ho difisiénsia ida ho totál família uma laran hamutuk na’in-4.
“Ho akontesimentu ne’e ami hakarak husu ba Eletricidade de Timor-Leste, Empreza Públika (EDTL, E.P.) kria sosializasaun kona-ba utilizasaun eletrisidade nian nune’e ita-nia komunidade bele komprende uza eletrisidade,” nia hato’o.
Nia dehan, eletrisidade parte Wetalitua nian foin lalais konkluidu obra eletrisidade iha fulan kotuk nune’e daudaun ne’e komunidade sei utiliza eletrisidade ho gratuitamente durate fulan neen (6).
Jornalista: Vitorino Lopez da Costa
Editór: Xisto Freitas da Piedade
