BOBONARU, 03 Outubru 2025(TATOLI)-Eletrisidade Timor-Leste (EDTL) no delegasaun territoriál munisípiu Bobonaru planeia atu monta iluminasaun iha kapitál Maliana hodi fó naroman ba komunidade sira ne’ebé tempu kalan halo movimentasaun iha estrada públiku.
Iluminasaun maka lampu sira ne’ebé uza hodi halo naroman ba estrada sira iha tempu kalan, nune’e ema la’o-ain sira, siklista no kondutór sira bele haree estrada ho klaru liu iha tempu kalan, nune’e bele hasa’e seguransa tránzitu nian no seguransa ba utilizadór sira estrada nian.
“Ami agora iha ona planu ida ne’ebé ke di’ak. Ita hare estrada ne’e moos, entaun liña eletrisidade mós tenke la’o ho di’ak. Ba oin ami sei rekezita tan lampu iluminasaun atu tau iha kapitál Maliana no mós sei ba to’o postu administrativu, nune’e ita hare sidade lMaliana ne’e bele furak uitoan”, Koordenadór EDTL Bobonaru, Mário de Jesus soares, informa ba jornalista sira, ohin.
Molok monta iluminasaun, empreza DMF Acesso Unip. Lda. finaliza ona projetu reablitasaun liña no poste eletrisidade husi ponte Nunura ba to’o Soso no empreza José Fernandes Unip. Lda. kontinua husi ponte Soso kobre área iha kapitál Maliana ne’ebé daudaun ne’e serbisu la’o hela.
“Liña sira ne’e tempu Indonezía nia kedas, tinan barak loos ona, kabu medida ki’ik, la merese uza ona depois ita-nia ai-riin sira sa’e mai ne’e mós lahuk hotu ona. Entaun, EDTL loke konkursu ba kompaña sira troka, se la troka sei mosu avaria beibeik iha Maliana”, katak.
Komunidade Anibal de Jesus Lopes fiar katak planu ne’e sedu ou tarde sei realiza. “Maliana ne’e kapitál Bobonaru, presiza tebes sasán sira hanesan ne’e, nune’e ema movimentu bá mai kualkér tempu sein ta’uk. Foin lalais iha Festivál Fronteira ne’e monta tiha ona lampu jalan, más ladun di’ak. Se agora EDTL dehan atu monta foun ne’e di’ak liu, tanba estrada foun mós di’ak ona, lampu jalan iha tan Maliana sai nabilan, ema bele halo atividade kualker tempu”, realsa.
Maliana postu administrativu ida iha munisípiu Bobonaru, no sai kapitál ba munisípiu Bobonaru ne’ebé tuir dadus sensu 2010 iha populasaun 25.234, husi suku hitu hanesan Lahomea, Ritabou, Raifun, Holsa, Odomau, Tapo-Memu no Saburai. Kapitál ne’e iha área 239,35 km².
Jornalista: Sergio da Cruz
Editora: Maria Auxiliadora
