DILI, 03 Outobru 2025 (TATOLI)—Xefe Suku Seloi Kraik, Silvestre Pinto Monteiro, informa komunidade na’in-800-resin ne’ebé kompostu husi aldeia Halimeta no Kablasi, Postu Administrativa Aileu Villa, Nunisípiu Aileu, seidauk asesu ba liña eletrisidade.
“Komunidade ne’e la asesu ba eletrisidade hahú kedas iha tempu invazaun Indonézia to’o agora, entaun durante ne’e sira sunu de’it lilin no solár panél ne’ebé balun hetan apoiu husi organizasaun naun-governamentál sira no balun sira-nian rasik,” Xefe Suku Seloi Kraik, Silvestre Pinto Monteiro, hateten ba jornalista sira iha edifísiu MOP, Kaikoli, kinta ne’e.
Aldeia rua ne’e, nia hateten, iha mós komunidade ne’ebé hetan afetadu ba prosesu reabilitasaun estrada iha Laulara, Fatisi hodi muda fali sira-nia hela fatin, maibé iha tinan 2025 aldeia balun iha Aileu mak Governu konsege konklui ona.
“Ami mós halo ona pedidu ba autoridade munisípiu no inklui iha fulan ida ba kotuk ha’u lori diretamente ba submete iha nasionál, maske seidauk hetan resposta maibé fiar katak iha tinan oin bele konklui,” nia dehan.
Enkuantu totál populasaun iha Suku Seloi Kraik hamutuk 4.246 ne’ebé kompostu husi aldeia 10 no xefe família hamutuk 419.
Prezidente Eletrisidade Timor-Leste, Paulo da Silva, hateten proposta ne’ebe sira simu husi lideransa komunitária sira daudaun ne’e ekipa planeamentu verifika hela dadus hodi kontinua halo levantamentu ba terrenu.
“Kestaun ida-ne’e ita tau hela ba programa prioridade 2026 nian, hodi konklui instalasaun liña eletrisidade ba nivél aldeia sira,” nia dehan.
Jornalista : Alexandra da Costa
Editór : Cancio Ximenes
