Komunidade Bobonaru preokupa la asesu sentru venda pulsa EDTL
BOBONARU, 03 Outubru 2025 (TATOLI) –Komunidade iha Bobonaru, liuliu sira ne’ebé hela iha área rurál lamenta tanba la asesu bá sentru venda pulsa husi empreza ne’ebé Eletrisidade Timor-leste fó lisensa.
Komunidade suku Ai-Asa, Armindo Lopes Mau Leto, triste tanba atu sosa pulsa eletrisidade tenke la’o ho distánsia dook.
“Agora sira tau tiha meteran ne’e, loja fa’an pulsa nia laiha fali. Ezemplu, ami iha Mazop ne’e atu sosa pulsa tenke la’o fali bá Bobobaru. Uluk ne’e bá Maliana Vila mak foin sosa, ne’e ami lakon, tanba sei hasai tan osan selu Angguna, Ojek. Dalaruma atu hola pulsa $1 nia de’it más osan transporte nia mak boot liu fali. Ami husu se bele loja ne’e loke to’o suku para ita labele la’o dook”, nia lameta ba Tatoli, iha merkadu Bobonaru.
Komunidade Agripina de Jesus rekomenda ba EDTL atu buka meiu ida ne’ebé di’ak hodi rezolve problema ne’e, tanba dalabarak uma-kain balu ahi-mate to’o loron rua ka tolu.
“Iha Bobonaru foin lais sa’e bá merkadu nia ne’e mak ema fa’an, más agora laiha ona tanba dehan kompañia ida loke ne’e la manán bee taka tiha. Ami sira iha ne’e kuandu pulsa hotu, titip tuir família balu bá Maliana mak sosa. Dalaruma bele to’o kedas, la’e loron ida ka ria mak ema lori mai. Se la’e telefone ba Dili mak sira haruka mai”, nia relata.
Ba kestaun ne’e, Koordenadór EDTL Bobonaru, Mário de Jesus Soares, dehan daudaun ne’e empreza ida husi postu Bobonaru, tolu iha Balibó, Lolotoe, hetan lisensa loke sentru venda pulsa. Enkuantu, postu administrativu Kailaku no Atabae ativu hela no la’o tinan barak ona.
Mário afirma bainhira empreza lokál sira la interese atu loke sentru venda pulsa, ba futuru, EDTL rasik sei buka meius hodi fasilita komunidade asesu besik.
“Meius ne’e liuhusi tékniku sira kolokadu iha suku, tanba fatin balu seidauk iha sentru venda pulsa. Ita halo hanesan ne’e para sira labele la’o dook”, dehan.
Entre juñu no agustu ne’e, EDTL Bobonaru halibur ona reseita hamutuk $141,686.40.
Jornalista: Sergio da Cruz
Editora: Maria Auxiliadora
