VIKEKE, 03 Outubru 2025 (TATOLI)–Sarani husi Postu Administrativu Ossú, Munisípiu hamutuk na’in-172 simu sakramentu krizma, tan ne’e Bispu Deiseze Baukau, Don Leandro Maria Alves husu krizmandu ne’ebé adultu ona tenke sai eskolta ba Jezúz Kristu no sarani sira mak fó seguransa ba Jezúz liuhusi hahalok sira.
“Sarani sira-ne’ebé adultu ona, iha ita-nia fiar, ita sempre dehan ita hanesan eskoltu ita-nia Na’i Jezúz nian. Ita mak fó seguransa ba ita-nia Na’i Jezúz. Ita fó liuhusi ita-nia hahalok sira no ita-nia liafuan di’ak sira. Labele ko’alia liafuan aat sira hanesan tolok, insulta, buli no liafuan mál sira seluk. Ita la manán buat ida husi liafuan aat sira-ne’e, maibé lori ita haketak-malu ho ita-nia maluk sira,” Don Leandro Maria Alves, hateten iha Kapela Uabubu, Sesta ne’e.
Bispu dehan Igreja ezije sarani sira buka atu hatene doutrina sira no sarani sira tenke hatene reza.
“Sarani sira tenke buka hatene reza, hafoin ita hakat bá-oin. Liuliu ba krizmandu sira tenke reza hatene no inan-aman sarani sira tenke fó suporta ba oan sarani sira-ne’ebé simu krizma,” nia prefere.
Tuir Líder Igreja Katólika ne’e Jezúz Kristu la husu buat seluk, la haruka halo buat seluk, haruka de’it dehan hadomi malu, buka perdua malu, buka respeita malu, buka atu rona inan-aman sira no buka rona na’i-ulun sira.
Entretantu, krizmandu hamutuk na’in-172 mai husi sarani sira husi Suku Uabubu no suku seluk sira iha Postu Ossú.
Jornalista: Vitorino Lopez da Costa
Editór: Xisto Freitas da Piedade
