DILI, 03 Outubru 2025 (TATOLI)—Tribunál Primeira Instánsia Munisipál Baukau aplika medida prizaun preventiva ba arguidu ho inisiál JP relasiona ho kazu omesídiu ne’ebé halakon vítima Sebastião Belo nia vida iha Vila Nova, Postu Administrativu Baukau Vila, Munisípiu Baukau.
Desizaun referida Tribunál Baukau aplika hafoin realiza julgamentu primeiru interrogatóriu ba arguidu JP ne’ebé hala’o iha loron-Kinta, 02 Outubru hafoin arguidu rekupera husi kanek ne’ebé durante ne’e halo tratamentu iha ospitál.
“Tribunál aplika medida koasaun ba hotu prizaun preventiva, maski kanek maibé kondisaun di’ak ona,” Defeza José de Lima informa ba TATOLI liuhosi telefónema, Sesta ne’e.
Arguidu JP nu’udár autór prinsipál ho kazu omesídiu ne’e ne’ebé suspeitadu sona Sebastião Belo to’o lakon vida, enkuantu arguidu RB ne’ebé hala’o ona julgamentu primeiru interrogatóriu iha Setembru konfensa envolve iha kazu referidu liuhosi asaun tuda vítima maibé la haree ho matan bainhira vítima hetan kanek to’o rezulta lakon vida.
Durante julgamentu, parte Ministériu Publiku (MP) alega arguidu na’in-rua ho Kódigu Penál artigu 138 kona-ba Tráfiku ba órgaun umanu sira (omesídiu simples) ne’ebé ameasa pena prizaun husi tinan 08-20.
“Ami hein despaxu Tribunál hodi halo analiza antes deside rekursu,” José de Lima akresenta.
Kazu omesídiu ne’e akontese iha loron Sábadu, 30 Agostu purvolta tuku 09:00 dadeer, ne’ebé komete husi suspeitu na’in-rua ho insiál JP no RB ne’ebé rezulta vítima Sebastião Belo lakon vida hafoin hetan kanek iha fuan iha-ne’ebé deskonfia kauza husi problema uma-laran.
Entertantu, Kódigu Penál artigu 138 kona-ba Omesídiu Simples hateten: 1) Sé mak hetan, muda, fó, transporta ka transfere hena, órgaun, substánsia sira ka parte sira husi ema seluk nia isin-lolon, lahó konsentimentu ka halai ba ameasa, uza forsa ka forma haka’as ho beran seluk, ba raptu, bosok, abuzu autoridade ka iha situasaun vulnerabilidade nian, ka liuhosi entrega ka hatán-simu husi selu osan ka benefísiu ka tulun atu nia hetan, tranzasaun, transporte ka armazenajen, sei kondena ho pena prizaun tinan 2 to’o 10.
2) Enkuantu husi pratika ba asaun sira-ne’ebé refere iha númeru anteriór rezulta konsekuénsia ruma ne’ebé hatuur nanis iha artigu 150 ka vítima mate, ema ne’e sei kondena ho pena prizaun tinan tolu (3) to’o 12 ka pena prizaun tinan lima (5) to’o 20.
3) Konsentimentu vítima nian sai irrelevante hanesan krime bainhira utiliza tiha kualkér meiu sira-ne’ebé temi tiha iha artigu anteriór.
Jornalista: Natalino Belo
Editór: Xisto Freitas da Piedade
