Inaugura ona Kapela Buibela-Uatulari

VIKEKE, 04 Outubru 2025 (TATOLI)—Kapela Buibela iha Postu Administrativu Uatulari, Munisípiu Vikeke, inaugura ona husi Primeiru-Ministru (PM), Xanana Gusmão, Sesta ne’e.

“Ohin mak ita foin inaugura sira-nia kapela. Bá ha’u kontente. Ha’u kontente tanba ha’u bele haree ha’u-nia bin-alin, maun-alin ne’ebé uluk hamutuk iha ai-laran ne’ebá sira sei moris no sira haree ha’u tanis tiha mak haku’ak ha’u,” Primeiru-Ministru Xanana Gusmão hateten iha serimónia inaugurasaun Kapela Buibela, Sábadu (04/010).

PM Xanana hatutan maski kapela ida-ne’e populasaun sira halo tinan-ualu mak foin ramata, maibé sira iha inisiativa ne’ebé di’ak. Kapela ne’e konstruidu tanba sarani sira mak fó kontribuisaun osan uitoan-uitoan.

Iha fatin hanesan, Xefe Suku Afaloikai, Cesário N. Pires haktuir Kapela Buibela lokaliza iha  Suku Afaloikai, maibé kapela ne’e ba sarani einjerál hosi Postu Administrativu Baguia, Munisípiu Baukau ne’ebé hela besik iha área Buibela hodi uza ba selebrasaun misa.

“Kapela Buibela ne’e tempu Portugés iha ona, maibé iha tempu okupasaun Indonézia ema sunu tiha. Tanba ne’e mak ami-nia komunidade inisiativa konstrui foun filafali kapela referida hodi uza ba selebrasaun misa  Domingu. Kapela ne’e ba komunidade einjerál ne’ebé   besik, liuliu  komunidade  Baguia,” nia akresenta.

Nia relata, konstrusaun kapela ne’e hetan tulun hosi Gabinte Apoia Sosiedade Sivíl (GASS), Dioseze Baukau no komunidade Buibela. Totál orsamentu ba konstrusaun hamutuk $20.000, no hahú konstrui iha 2018.

Iha serimónia inaugurasaun ne’e hetan parsitipa husi autoridade lokál, veteranu no sarani hosi Suku Afaloikai no  Baguia.

Jornalista: Vitorino Lopez da Costa

Editór:  Xisto Freitas da Piedade