DILI, 04 Outubru 2025 (TATOLI)— Sentru Voluntáriu Fundasaun Nippon kolabora ho Ajénsia Kooperasaun Internasionál Japaun (JICA) no Liga Futeból Profisionál Japaun (J.League) hala’o semináriu kona-ba futeból ba estudante ensinu báziku sira iha Dili no Metinaru, ne’ebé konta ho eis-jogadór profisionál Japaun, Masa Kiba, nu’udar treinadór.
Eventu ho títulu “Liga Ita-nia Mehi – Projetu Futeból 2025 iha Timor-Leste” akontese iha sábadu dadeer (4 Outubru) iha Kampu Manleu.
Labarik hamutuk 60-resin husi eskola primária no sekundária, inklui membru husi Dili YMCA (Asosiasaun Kristaun Mane Foinsa’e), partisipa iha eventu ne’e. Estudante Voluntáriu Japaun na’in-12 no Voluntáriu JICA Timor-Leste mós partisipa.
Koordenadór Sentru Voluntáriu Fundasaun Nippon, Hiroki Sugiyama, hateten eventu ne’e hanesan kontinuasaun husi programa ne’ebé implementa uluk iha tinan 2024, hafoin Prezidente Fundasaun Nippon Yamawaki hasoru malu ho Prezidente Repúblika, José Ramos-Horta, ne’ebé atu apoia dezenvolvimentu futeból iha Timor-Leste (TL).
“Ida-ne’e hahú hanesan parte ida husi ami-nia esforsu sira hodi apoia edukasaun labarik sira-nian iha Timor-Leste. Tinan liubá, Prezidente Ramos-Horta husu ami atu ajuda dezenvolve futeból, no hahú husi ne’ebá ami kontinua kolaborasaun ne’e tinan-tinan”, Hiroki Sugiyama hateten ba jornalista sira iha Manleuana, sábadu ne’e.
Hiroki esplika katak iha tinan ne’e programa referidu habelar ba Metinaru no apoia tan ekipamentu. “Klube J.League fó ona ekipamentu futeból hamutuk 700, barak liu duké tinan kotuk, ne’ebé fahe ba labarik sira no uza iha klase sira treinu nian”, nia hateten.
Durante sesaun treinamentu, treinadór konvidadu Masao Kiba, ne’ebé sai kapitaun ba J.League husi tinan 1993 to’o 2004 no agora sai hanesan embaixadór J.League iha Ázia, fahe informasaun bázika sira kona-ba téknika futeból nian ho labarik sira.
“Ha’u hakarak hanorin sira kona-ba fundamentu sira hanesan trapamentu no pasajen. Husi ne’ebá, sira bele dezenvolve abilidade sira seluk. Sira entuziasmu tebes no motivadu tebes. Ha’u hein katak sira kontinua pratika loron-loron”, Masao Kiba dehan.
Yukina Irii (22) husi Universidade Shizuoka nu’udar voluntáriu ida hateten katak nia gosta halo interasaun ho labarik timoroan sira.
“Sira enerjétiku tebes, ativu, no sai besik lalais. Sira moe iha inísiu, maibé hafoin ko’alia, sira sai amigavel tebes. Ha’u kontente atu haree sira-nia entuziasmu foun ba futeból”, nia hateten.
Semináriu ne’e ho objetivu la’ós de’it atu hanorin abilidade desportu nian, maibé mós atu hametin amizade entre Japaun no Timor-Leste liuhusi atividade edukasionál no sosiál sira.
Sentru Voluntáriu Fundasaun Nippon ativu ona dezde 2010 no haruka ona estudante voluntáriu liu rihun 12 ba projetu sosiál no umanitáriu oioin, inklui tulun pós-rai-nakdoko, Olimpíada Tókiu 2020, no eventu desportivu internasionál sira hanesan Klásiku Mundiál Beisebol 2023. Sira-nia plataforma voluntáriu, “Bokatsu!”, agora iha membru rejistadu hamutuk rihun 48-resin.
Jornalista: Hortencio Sanchez
Editora: Maria Auxiliadora
