BOBONARU, 06 Outubru 2025 (TATOLI)-Projetu konstrusaun gabiaun ne’ebé ezekuta husi empreza Lesuburo Unipesoál Lda. iha mota Bulobu, suku Manapa, postu administrativu Kailáku, munisípiu Bobonaru, dadaun ne’e nia progresu servisu fíziku to’o ona metru 340 no hela metru 150.
Projetu konstrusaun gabiaun ne’e ho objetivu atu sátan bee-mota Bulobu hodi proteje komunidade nia to’os no natar iha área Haurema, Mautalo no Raeana inklui proteje estrutura ponte Bulobu no ponte Pakistan.
Enjeñeiru husi empreza Lesuburo, Octaviano Marçal Soares, dehan bazeia ba pedidu pagamentu iha fulan kotuk progresu fizíku atinje ona 55,62%.
Nune’e, sei entrega obra ne’e tuir kontratu tanba stock materiál lokál sufisiente no traballadór grupu 13 ho totál ema na’in-60 preparadu atu aselera serbisu.
“Projetu ne’e nia data finaliza iha fulan-Novembru, ne’ebé ami garante [tuir] data kontratu”, nia informa ba jornalista sira, ohin.
Obra ne’e ho distánsia kilómetru ida-resin ne’ebé responsabliza husi empreza Lesuburo ho valór orsamentu $521.97,03 no Devita Unip. Lda. Ho montante $618.618,22 ba durasaun tempu to’o Novembru 2025.
Xefe suku Manapa, Zeferino Loco Berre, kontente tanba kompañia Lesuburo hatudu progresu serbisu di’ak.
Autoridade lokál ne’e preokupa ho servbisu husi empreza Divita, tanba projetu ne’ebé ezekuta husi kompañia ne’e la’o atraza.
“Projetu rua ne’e implementa hanesan, maibé Lesuburo nia hein de’it bolu eskavadór taka tia rai-henek iha kotuk ne’e hotu ona. Agora, Devita la’o neineik”, dehan.
Hodi rekomenda atu aselera serbisu tanba agora besik ona tempu udan. “Bainhira la aselera, udan boot mai afeta ba riin eletrisidade no ponte Pakistan bele sobu tan natar komunidade nian”, nia preokupa.
Tuir informasaun ne’ebé jornalista Tatoli rekolla, instalasaun gabiaun husi kompañia Devita foin atinje metru 180 husi totál metru 400-resin.
Notísia relevante: Empreza rua hahú implementa projetu morru protesaun iha mota Bulobu
Jornalista: Sergio da Cruz
Editora: Maria Auxiliadora
