DILI, 06 Outubru 2025 (TATOLI)–Prezidente Autoridade Munisípiu Dili (AMD), Francisco dos Santos hateten AMD identifika ona fatin tolu atu estabelese estasionamentu públiku.
“Fatin tolu ne’ebé mak identifikadu atu halo estasionamentu própriu iha dalan públiku. Ida mak iha Bebora,” Francisco dehan ba TATOLI, iha nia kna’ar fatin, Matadouru, Dili, Segunda ne’e.
Nia haktuir katak bainhira iha atividade ruma iha Palásiu Prezidensiál nian sempre mosu engarrafamentu iha fatin públiku.
Prezidente AMD dehan estasionamentu seluk mak iha sede Partidu Demokrátiku (PD) nia oin. Ida-ne’e akomula husi Igreja Katedrál, Ministériu Justisa (MJ) inklui ema sira-ne’ebé servisu iha sede PD no parte notariadu nian.
“Ita kria fatin ruma iha leten hanesan vertikál ruma hodi halo sala enkontru para sira halo atividade. Entaun, atividade bele realiza iha leten no karreta sira para iha kraik.
Estabelesimentu estasionamentu ikus mak ex Sporting nian, ne’ebé akumula husi Banku Mandiri tanba transporte barak trankadu iha BNU, Ministériu Ensinu Superiór Siénsia no Kultura (MESSK) relasiona ho atividade lubuk iha área ne’e hanesan iha Portu Dili, Universidade Nasionál Timor Lorosa’e (UNTL), Parlamentu Nasionál (PN) no Palásiu Governu (PG).
“Daudaun ne’e, Ministériu Obra Públika halo hela meiu ida hodi halo alargamentu estrada ne’e tanba transporte aumenta maibé estrada kloot.
“Ida-ne’e presiza kria kondisaun no espasu ne’ebé mak bele akumula transporte sira. Entaun, husi Autoridade Munisípiu Dili tenke iha ona estratéjia para oinsá bele redús engarrafamentu iha sidade Dili,” Francisco subliña.
Nia dehan planu sira-ne’e sei hato’o ba parte relevante sira atubele halo estudu ida, atu oinsá labele hamosu engarrafamentu iha fatin públiku.
Jornalista: Osória Marques
Editór: Xisto Freitas da Piedade
