MJ hahú estabelese komisaun rekruta juiz prepara ba instalasaun STJ
DILI, 06 Outubru 2025 (TATOLI) – Ministru Justisa, Sérgio Hornai, informa, daudaun ne’e Governu hamutuk ho Tribunál Rekursu hahú estabelese komisaun rekrutamentu ba juis sira hodi prepara ba instalasaun Supremu Tribunál Justisa iha Maiu 2026.
Nia esplika, tuir lei organizasaun judisiáriu artigu 83 katak, presiza iha uluk komisaun selesaun no rekrutamentu juiz hafoin haree ba buat seluk ba instalasaun Supremu Tribunál Justisa ne’e.
“Komisaun rekrutamentu ne’e sei envolve husi Parlamentu Nasionál ema na’in-rua no Prezidente Repúblika nain-ida no sei rona Konsellu Superiór atu halo rekrutamentu ba Juiz konselleiru sira no Juiz embargadór na’in-hitu mak sei prepara ba instalasaun STJ ne’e,” Sergio Hornai hateten ba Tatoli iha Sentru Formasaun Jurídiku Judisiariu iha Kaikoli, segunda ne’e.
Governante ne’e dehan, kona-ba estabelesimentu Supremu Tribunál Justisa iha ona roteiru no ida ne’e Governu ko’alia ho Parlamentu Nasionál no Prezidente Repúblik, Governu no Tribunál rasik, hodi koordena malu oinsá atu aselera instalasaun Supremu Tribunál Justisa.
Nia hatutan, molok instalasaun Supremu Tribunál Justisa ne’e iha, Governu no Tribunál Tribunál Rekursu hahú prepara rekursu umanu hodi prienxe ba hala’o servisu.
“Komisaun rekrutamentu no instalasaun ba iha rekrutamentu juiz ita komesa estabelese daudaun no Prezidente Repúblika mós ba haree ona fatin iha eis Tribunál Distritál Dili Kolmera ba futuru estabelese komisaun ida ne’e nian,” nia informa.
Eis Komisáriu Komisaun Anti-korrupsaun ne’e haktuir, fatin eis-Tribunál Distritál Dili, Kolmera ba futuru bele nakfilak sai Tribunál Supremu Justisa, maibé depende ba planu husi Tribunál Rekursu nian.
Ministru Justisa Sergio Hornai dehan, bainhira instalasaun Supremu Tribunál Justisa hahú ona, sei iha mós Prokuradór da Repúblika Rekursu no Defensór Públiku Jerál sei kontribui atubele hatán ba problema sira iha Tribunál Rekursu.
Nia fundamenta, Governu hamutuk Tribunál Rekursu mós sei reabilita fila fali eis Tribunál Duili, maibé ida ne’e la’ós prioridade uluk, tanba Governu foku uluk ba rekursu umanu, molok STJ ne’e iha.
“Infraestrutura ne’e fasil, maibé ha’u hanoin ita presiza ita-nia rekursu bainhira kompleta ona, buat seluk bele prepara dala-ida,” nia konklui.
Jornalista: Natalino Costa
Editór: Evaristo Soares Martins
