DILI, 07 Outubru 2025 (TATOLI)–Delegasaun Sosiedade Sivíl husi Timor-Leste ne’ebé lidera husi Diretór Ezekutivu Forum Organizasaun Naun Gouvernamentál Timor-Leste (FONGTIL), Valentim da Costa Pinto, partisipa iha konferénsia ASEAN ba povu hodi diskute asuntu urjente ne’ebé povu nasaun membru ASEAN sira enfrenta.
Iha atividade ne’e, Embaixadór Timor-Leste ba Indonézia Roberto Soares, fó saudasaun ba delegasaun referidu hodi partisipa atividade ne’e ho susesu.
Delegasaun ne’ebé partisipa iha konfrénsia ne’e mak hanesan, Konsellu Nasionál Juventude Timor-Leste (CNJTL), FOKUPERS, Fundasaun Belun, Asosiasaun HAK, Luta Hamutuk, Fundasaun Alola no seluk tan.
“Enkontru ne’e troka opiniaun no perspetiva kona-ba papél krítiku sosiedade sivíl nian iha promosaun lei internasionál, direitu umanu no demokrasia, subliña importánsia kolaborasaun entre organizasaun sosiedade sivíl no Governu kona-ba salvaguarda interese estratéjiku no nasionál Timor-Leste nian,” refere nota ne’ebé Tatoli asesu husi media Ministériu Negósiu Estranjeiru no Kooperasaun (MNEK), ohin.
Sorumutu ne’e reflete liután Timor-Leste nia prinsípiu polítika esterna no kompromisu atu kontinua haburas parseria forte entre sosiedade sivíl no Governu, ho objetivu atu hasa’e governasaun demokrátiku no tane aas direitu umanu iha rejiaun laran.
Konferénsia ASEAN ba Povu hala’o iha Otél Sultan iha Jakarta durante loron rua (2), hahú 04-05 fulan-Outubru 2025, hodi halibur líder sira, ativista sira, sosiedade sivíl no parte interesada sira-ne’ebé relevante hodi diskute kestaun urjente sira-ne’ebé maka povu ASEAN no rejiaun hasoru.
Jornalista : Hortencio Sanchez
Editór : Cancio Ximenes
