DILI, 07 Outubru 2025 (TATOLI)—Empreza Timor Safari, tersa ne’e, entrega karreta ambulánsia haat ba Governu liuhusi Ministra Saúde, Elia dos Reis Amaral.
Ministra Saúde, Elia dos Reis Amaral, hateten karreta ambulánsia haat ne’ebé Governu sosa liuhusi Empreza Timor Safari ne’e, to’o ona Timor-Leste no tuir planu karreta ambulánsia ida apoiu labarik sira, ida seluk ba iha VIP no rua sei distribui ba munisípiu.
“Ambulánsia haat ne’ebé ita sosa ho Orsamentu Jeral Estadu 2025 ho totál orsamentu hamutuk rihun $300, entaun husi ne’e ambulánsia ida ba pediatria nian, ida ba VIP, ida distribui ba munisípiu Viqueque no ida seluk distribui ba munisípiu Ermera,” Ministra Elia hateten ba jornalista sira iha Palasiu da Sinzas, Kaikoli, ohin.
Nia esplika, ba futuru sei aumenta tan karreta ambulánsia ba munisípiu sira hotu, nune’e kobre ba área rurál sira tanba programa Governu Konstitusionál da-sia (IX) ne’e atu lori saúde ba komunidade.
Karreta ambulánsia sira-ne’ebé mak iha, nia dehan, hahú la’o ho programa integradu saúde hodi tun ba terrenu atu fó tratamentu ba komuniddae iha baze.
Iha fatin hanesan, Diretór Empreza Timor Safari, Kennteh Lay hateten karreta ambulánsia haat (4) ne’e sosa iha nasaun Tailándia ho kualidade diak.
“Amii sosa karreta ambulánsia haat ne’e iha nasaun Tailandia ho kualidade di’ak,” Diretór Empreza Timor Safari Kennteh Lay hateten.
Diretór Serbisu Nasionál Ambulánsia no Emerjénsia Médika (SNAEM), Simplicio Amaral, hateten ambulánsia haat ne’ebé Governu sosa ne’e, karreta ambulánsia ida SNAEM sei prepara ba ospitál foun pediátria andar haat iha HNGV, tanba tuir informsaun katak iha fulan-Dezembru kontrusaun ne’e rasik sei entrega ba Governu.
Ambulánsia mai sei tau ida ba iha ospitál andar haat ne’e tanba tuir informasaun katak konstrusaun refere Dezembru entrega, entaun ambulánsia tolu seluk ida ba VIP no ida seluk ba munisipiu rua (2).
Nia relata, totál ambulansia husi teerestre ne’ebé mak agora daudaun kondisaun di’ak iha territóriu nasional ne’e hamutuk 39 no aumenta ho haat (4) ne’ebé mak sei mai tan hamutuk 43, no ida-ne’ebé mak entrega ona ba patrimoniu Estadu ne’e hamutuk 28.
Jornalista : Felicidade Ximenes
Editór : Cancio Ximenes
