DILI, 01 Outubru 2025 (TATOLI)—Família pasiente husi inséndiu ne’ebé akontese iha Suku Haupu, Postu Administrativu Letefoho, Munisípiu Ermera preokupa ho atendimentu servisu Ministériu Saúde nian, tanba laiha karreta ambulánsia transfere pasiente entaun família pasienta tula ho karreta privadu transporta pasiente mai Dili.
Inséndiu ne’ebé akontese semana kotuk (26/09/2025) iha Munisípiu Ermera, rezulta ema na’in-lima (5) mak lakon vida no na’in-ida (1) kanek no halo hela tratamentu iha Hospitál Nasionál Guidu Valadares (HNGV, sigla portugés).
“Rekomendasaun ba parte Ministériu Saúde, ita haree Sentru Saúde sira iha munisípiu menus tebes ba karreta ambulansia. Iha momentu ne’ebé inséndiu akontese, ami kontaktu durante minutu 40 ba Sentru Saúde Ermera hodi evakua vítima sira atu salva sira-nia vida, maibé laiha ema-ida (1) mak responde no ami deside tula rasik pasiente ho karreta privadu, tenke haree didi’ak situasaun sira-ne’e,” Família vítima, Saturnino dos Santos hateten ba jornalista sira iha HNGV Dili, kuarta ne’e.
Nia haktuir katak, bainhira evakua ona vítima sira mai iha Sentru Saúde Glenu kuaze oras ida (1) liu, maibé laiha nafatin ambulánsia atu evakua pasiente mai Dili, ho nune’e família deside tula de’it iha karreta privadu hodi lori mai halo tratamentu iha HNGV.
“Hanesan komunidade ami sente triste tebes ho kondisaun sira hanesan ne’e. Informasaun ne’ebé ami hetan katak, karreta ambulánsia ida (1) de’it mak iha Sentru Saúde Glenu, maibé sira fó razaun karreta ne’e tula hela pasiente mai Dili,” nia haktuir.
Tuir kronolojia ne’ebé iha, inséndiu ne’e akontese kauza husi sunu lilin iha uma-laran la kontrola ho di’ak ikus mosu inséndiu referidu.
“Inséndiu ne’e akontese tanba matebian nia oan-feto nia ain kona kois lilin ne’ebé sira sunu iha uma-laran, monu ba akua ne’ebé ense hela kazolina ikus nakfakar mak ahi haan kedan mai zelera ida iha kotuk, nune’e gás zelera nian nakfera halo matebian sira iha hela uma-laran sai la-biban ikus la konsege salva vida,” nia hateten.
Vítima na’in-lima (5) ne’ebé mate husi akontesimentu ne’e kompostu husi aman, inan ho kondisaun gravida no oan na’in-rua (2). Enkuantu vítima ne’ebé mak sei halo hela tratamentu iha HNGV mane ho idade tinan lima (5).
Iha fatin hanesan, Xefe Departamntu Sirurjia HNGV, Hermenia Almeida Fernandes, hateten labarik mane ne’ebé halo hela trataemntu iha HNGV médiku sira halo ona observasaun jerál tanba maioria isin lolon kanek hotu.
“Labarik ne’e idade tinan neen (5) nia liman no isin sira kanek hotu, médiku sira halo ona observasaun jerál no fó hela tratamentu,” nia dehan.
Jornalista : Felicidade Ximenes
Editór : Cancio Ximenes
