BOBONARU, 07 Outubru 2025 (TATOLI)-Autoridade Munisípiu Bobonaru realiza semináriu kona-ba implementasaun kompeténsia ne’ebé desentralizada hodi aprezenta progresu, dezafiu no oportunidade sira.
Atividade ne’e organiza hodi fornese plataforma ba fahe informasaun, reforsa koñesimentu, no fó espasu atu hatene situasaun reál husi implementasaun polítika no prosesu desentralizasaun ba autoridade munisipál, liuhusi servisu munisipál sira.
Semináriu ne’e halibur administradór postu administrativu neen, xefe suku 50, no parseiru dezenvolvimentu sira ne’ebé serbisu besik iha área desentralizasaun nian hodi halo reflesaun kona-ba progresu ba programa sira, meiu sira atu responde ba dezafiu sira iha ámbitu desentralizasaun, no aliña prioridade sira ba futuru governasaun desentralizada iha Timor-Leste.
Objetivu husi eventu ne’e mak aleinde hametin koordenasaun entre servisu munisipál no autoridade hodi reforsa polítika no Programa Desentralizasaun Administrativa no Podér Lokál, identifika prioridade estratéjika hodi reforsa kapasidade munisipiu Bobonaru hodi prepara-an ba avaliasaun kondisaun mínimu no prepara ba instalasaun podér lokál.
Prezidente Autoridade Bobonaru, Paulo Moniz Maia, hateten aprezentasaun iha semináriu ne’e toka liu ba mandatu ne’ebé delega no prioridade ho rekomendasaun saida mak presiza hato’o, nune’e bele hadi’ak liután serbisu sira iha tinan ne’e nia ronan no inisíu tinan 2026 hodi konkretiza polítika Governu sentrál iha desentralizasaun instutuisionál hodi hakat bá podér lokál.
“Seminariu ohin bele tulun ita atu tau hamutuk hanoin hodi solusiona dezafiu sira ne’ebé enfrenta. Iha balu ita refere ba Governu sentrál, balu ita bele inklui dentru ita-nia mandatu, nune’e tinan oin mai ita bele prontu hakat bá podér lokál”, nia dehan.
Diretó Nasionál Apoia Administrasaun Suku (DNAAS), Ministériu Administrasaun Estatál, Celestino Marques (MAE), konsidera seminariu ne’e la’ós de’it forma avaliasaun ida, maibé sai mós espasu ba apresiasaun no aprendizajen.
“Ne’e nu’udar pasu preparativu ida ba implementasaun podér lokál ne’ebé maduru, transparante no responsavel tuir espíritu desentralizasaun nian ne’ebé konsagra iha Konstituisaun no mós iha dekretu-lei 84/2023”, salienta.
Relatóriu husi seminariu ne’e Autoridade Munisípiu Bobonaru sei submete ba MAE hodi hato’o ba Primeiru-Ministru, Xanana Gusmão, hanesan matéria ida atu toka iha eventu boot ne’ebé sei raliza iha Dili ho prezensa husi membru Governu no parseiru sira hotu.
Notísia relevante:Entidade sira simu PAM foun Bobonaru, prometidu sei la halo divizionizmu
Jornalista: Sergio da Cruz
Editora: Maria Auxiliadora
