Governu Indonézia sei harii muzeu amizade entre Indonézia-TL iha TMII Jakarta
DILI, 07 Outobru 2025 (TATOLI)—Governu Indonezia liuhusi Ministru Kultura Repúblika Indonézia, Fadli Zon, atualiza Governu Indonézia nia planu atu harii muzeu amizade entre Indonézia no Timor-Leste iha Taman Mini Indoneñézia Indah (TMII) Jakarta.
Notísia Relevante: Indonézia no Timor-Leste halo kooperasaun hodi hametin lasu kulturál
“Iha futuru, ami mós planeia atu harii Muzeu Amizade Indonézia-Timor-Leste iha Taman Mini Indonézia Indah, ne’ebe hamutuk mós ho ha’u iha ne’e mak nu’udar Prezidente Interinu Diretór TMII nian,” Ministru Kultura Indonezia ne’e informa ba jornalista iha Palasiu Governu, ohin.
Muzeu ida-ne’e, nia dehan, bele sai hanesan ponte kultura ne’ebe hametin relasaun entre nasaun rua liuhusi diplomasia kultura, tanba ne’e nia laran metin katak liuhusi ponte kulturál ida-ne’e, nasaun rua bele hametin relasaun ema-ba-ema iha futuru.
“Uluk TMII iha pavilaun Timor Timur, agora Timor Timur sai ona nasaun Timor-Leste, ami hakarak transforma nia ba muzeu ida-ne’ebé hatudu Timor-Leste nia amizade no kultura. Entaun, ba oin, Timor-Leste nia kultura no obra sira mós bele hatudu iha ne’ebá,” Governante Indonézia ne’e dehan.
Ministru Juventude, Desportu, Arte no Kultura, Nelyo Isaac Sarmento, hateten uluk Timor-Leste sei iha provínsia Indonézia ba da-27, iha jardin jardin ka Taman Mini Indonesia Indah iha Jakarta ne’e hatudu identidade Timor nia, entaun iha hanoin ida husi Ministru Kultura Indonézia atu hadi’a di’ak liután fatin ida-ne’e atu bele sai hanesan muzeu ida hamutuk, atu nune’e korelasaun entre Timor-Leste ho Indonézia sei kontinua nafatin ba oin.
“Purtantu, ida-ne’e ideia foun ne’ebé mak toka mai ita haree ba oin atu iha kooperasaun ne’e hodi hametin liután Kooperasaun liuhusi nota entendementu balun para ita la’o hodi fortifika ita-nia relasaun liuhusi atividade kultura,” nia dehan.
Istória Museum Timor Timur
Museu Timor Timur ne’ebé konstrui iha Taman Mini Indonesia Indah (TMII) ne’e, harii iha tinan 1979 iha rai ho luan 43.988 ne’ebé inaugura husi Prezidente Repúblika Indonézia, Soeharto iha 29 Abríl 1980.
Museum Timor Timur ne’e koloka iha parte norte iha Istana Anak-Anak Indonesia (ISAAI) ne’ebé se oin ba Museum Perangko Indonesia dan Museum Fauna Indonesia no Taman Reptilie Komodo.
Hafoin Timor-Leste hetan ukun rasik an iha 1999, Museum Timor Timur ne’e nafatin harii metin iha Taman Mini Indonesia Indah (TMII), ho objetivu atu komunidade nafatin hadomi kultura Timor Timur ne’ebé uluk sai provinsia ba da-27 iha NKRI durante tinan 24 nia laran.
Jornalista : Alexandra da Costa
Editór : Cancio Ximenes
