DILI, 07 Outubru 2025 (TATOLI)-Meza Parlamentu Nasionál (PN) baixa Proposta Lei númeru 23/VI(3a) Orsamentu Jerál Estadu (OJE) 2026 ba Komisaun C ba Asuntu Finansa Públika no Komisaun espesializada permanente sira seluk.
Prezidente Parlamentu Nasionál, Maria Fernanda Lay, husu Komisaun sira atu toma atensaun ba kalendáriu diskusaun nian iha audiénsia.
Antes ne’e, Prezidente Komisaun C, Cedelízia Farria dos Santos, dehan sira prepara ona kalendáriu diskusaun ba proposta OJE 2026.
Tuir ezbosu kalendáriu Komisaun nian, iha fulan-Outubru nia laran komesa halo ona audiénsia públika ho liña ministerial sira. Diskusaun iha plenária faze jeneralidade hahú husi loron 05 to’o 07 Novembru, kontinua ba espesialidade durante semana rua no previzaun 26 Novembru aprova iha finál globál hodi haruka ba Prezidente Repúblika bele halo promulgasaun.
Lembra katak Governu, iha loron 01 fulan-Outubru, submete ona proposta lei OJE ba tinan fiskál 2026 ho montante billaun $2,3 ba PN.
Notísia relevante: https://tatoli.tl/2025/10/01/governu-aprezenta-ona-proposta-lei-oje-2026-ba-parlamentu-nasional/
Jornalista: Nelson de Sousa
Editora: Maria Auxiliadora
