DILI, 07 Outubru 2025 (TATOLI) – Diretór Servisu Investigasaun Kriminál (DSIK) Nasionál, Superintendente Polísia João Belo dos Reis hateten, Polísia Nasionál Timor-Leste (PNTL) halo apreensaun ba sigarru marlboro karton hamutuk 389 iha Munisípiu Kovalima.
Apreensaun ne’e bainhira Komandante Polísia Nasionál Timor-Leste Munisípiu Kovalima iha segunda (06/10), tuku 02:00 madrugada halo pasa revista iha área Salele tasi, Kasabsuk identifika katak movimentu ne’ebé deskonfia halo tranzasaun ilegál. Nune’e bazea ba informasaun ne’ebé sira kolleta iha terrenu ne’e, deteta duni katak iha fatin ema estrajeiru xineza ida importa sasán ilegál mai ho ró boot depois sasán sira-ne’e transfere ba ró ki’ik hodi transporta mai tasi ibun.
Husi bero hirak-ne’e mak Komandu PNTL Munisípiu Kovalima deteta sigarru hamutuk 388 kaisa, bero haat, karreta ida, nune’e PNTL momentu ne’ebá kedas halo apreensaun ba sasán hirak-ne’e, maibé suspeitu sira ne’ebé hatama sasán kontra bandu sira ne’e mak polísia momentu la halo identifikasaun tanba halai lakon.
“Agora prosesu investigasaun la’o hela, ita tenta atu bolu bero na’in no karreta na’in ne’ebé hela iha ne’ebá hodi husu sira-nia responsabilidade prosesu ne’e la’o,” Joao Belo ko’alia iha Kuartél Jerál PNTL, Kaikoli, tersa.
Nia dehan, sasán ilísitu sira hanesan sigarru marlboro karton hamutuk 389 no bero haat, motór ualu ne’ebé para iha fatin akontesimentu inklui karreta ida polísia halo apreensaun no sasán sira ne’e nu’udar objetivu krime ne’ebé sustenta ba prosesu investigasaun.
Belo hateten, kazu ne’e PNTL submete ona ba Ministériu Públiku ho numeru NUC 0319/25 PNSIC.
Nia dehan, atu prevene sasan ilísitu sira ne’e labele tama territóriu Timor -Leste mak Komandu alerta ba Unidade Patrullamentu Fronteira (UPF) no Unidade Polísia Marítima (UPM) atu halo seguransa másimu hodi prevene hahalok sira-ne’e.
Diretór Servisu Investigasaun Kriminál ne’e informa ho hahalok sidadaun estranjeiru ne’ebé hatama ilegál sigarru marlboro karton 389 nune’e Estadu lakon tanba tuir loloos sidadaun ne’e selu iha Tibar ne’e rihun ida-resin.
“Maibé tanba hatama sasán la selu tasa, entaun ne’e PNTL konsidera krime kontra bandu no akuza nafatin lakohi selu tasa no hatama sasan ilegál,” nia konklui.
Jornalista: Natalino Costa
Editór: Evaristo Soares Martins
