DILI, 07 Outubru 2025 (TATOLI)—Prezidente Juri ba bolsa estudu Kuba, Vidal Lopes, informa vaga ne’ebé publika kona-ba bolsa estudu ba Kuba laiha sistema diskriminasaun maibé loke ba ema hotu.
“Timoroan hotu iha direitu atu konkore iha vaga bolsa estudu ba Kuba nian, iha ema balun preokupa dehan bolsa ne’e ba de’it ema-boot nia oan, maibé realidade laiha vaga ne’e ba ema Timor hotu bele konkore tantu nia-ema boot no ema-kiik,” Vidal Lopes hateten ba jornalista sira iha Hospitál Nasionál Guido Valadares (HNGV), Bidau, tersa ne’e.
Nia klarifika tan, prosesu vaga ne’e haree sé mak prienxe kritéria ne’ebé fó sai iha direitu absolutamente konkore, hanesan juri sempre simu orientasaun hotu husi Ministériu Saúde no prontu ezekuta tuir servisu ne’ebé define ona.
“Ami hatene katak buat hotu la’o tuir nia dalan, maibé médiku sira mesak profisionál ladun satisfas vaga ne’e bele kanaliza liuhusi instituisaun relevante sira, hodi halo prosesu ida-ne’e mak ami-nia pozisaun. Maibé, hotu-hotu hanesan, laiha presaun polítika no la’o tuir prosesu juri nian,” nia dehan.
Nia konfirma, vaga ne’e iha ema na’in-16 mak pasa ona iha prosesu hotu, nune’e iha tempu besik aranka ona ba Kuba hodi eskola.
“Bolseiru sira-ne’e hamutuk na’in-16 sei aranka iha tempu badak no prosesu hotu-hotu loos-ona sira bele aranka ona. Atu ba ema nia nasaun ne’e lá fasil, hanesan pasaporte sira-ne’ebé mak besik mate ona tenke estende tan. Ita-nia estimasaun sira sei aranka iha fulan-Outubru nia rohan ka inisiu fulan-Novembru,” nia hateten.
Bolsa estudu ne’ebé oferese husi nasaun Kuba, espesiál ba médiku timoroan sira atu kontinua sira-nia estudu espesialista ho durasaun tinan haat (4) resin.
Bolsa referidu médiku timoroan sira sei ba foti espesialidade iha área 15 hanesan, neofrolojia, neusirurjia, operasaun ulun, ortopedia, sirurjia vaskulár, medisina interna no seluk tan.
Kritéria ba konkorente sira antes tuir vaga ne’e mak, médiku tenke iha esperiénsia servisu tinan lima (5) liu, sidadaun Timor-Leste, Funsionáriu Públiku, valór akadémiku tenke 3,5 ba leten.
Jornalista : Felicidade Ximenes
Editór : Cancio Ximenes
