KOVALIMA,08 Outubru 2025 (TATOLI)-Prezidente Asosiasaun Futeból Munisípiu Kovalima, Domingos Barreto Goveia, rekoñese kompetisaun jogu fronteira CUP tinan 2025 ne’ebé hala’o iha munisípiu Kovalima ladun iha preparasaun másimu hosi komisaun organizadora.
Prezidente Asosiasaun Futeból Munisípiu Kovalima, Domingos Barreto Goveia. Imajén/TATOLI,Celestina Teles
“Ha’u triste haree ba atendimentu jogadór husi RAEOA no Bobonaro ne’ebé Kovalima maka sai uma-na’in hodi organiza jogu fronteira cup ne’e, jogadór sira tenke hela iha rezidénsia ida maibé, item ba ida-ne’e laiha,” nia hateten ba jornalista sira iha Kampu Ladi.
Nia dehan, problema ne’e mosu tanba menus liña koordenasaun no komunikasaun di’ak entre komisaun sira hodi fó atendimentu ba ekipa jogadór no treinadór sira ne’ebé maka husi munisípiu Bobonaro no Rejiaun Administrativa Espesiál Oekusi (RAEOA).
“Mosu fallansu tanba ita haree falta iha komunikasaun nune’e ba futuru sei hadi’a jestaun ho di’ak liu hodi halo koordenasaun ho desportu ho modalidade neen,”nia promete
Iha sorin seluk Treinadór Futebol RAEOA, Agustinho da Costa, observa Komisaun Organizadora ba eventu kompetisaun jogu fronteira Cup ne’ebé maka organiza husi Ministériu Juventude Desportu Arte no Kultura no servisu hamutuk ho Sentru Juventude Kovalima laiha preparasaun di’ak tanba fatin ba jogadór sira hela ne’e ninia kondisaun la seguru.
“Ami-nia jogadór desportu husi modalidade futeból RAEOA ne’ebé jogu la’o ho di’ak. Maibé, ami hasoru difikuldade maka kampu ladun di’ak jogadór sira atu joga,” nia informa.
Jogu fronteira CUP ne’e hetan abertura hosi Ministru Juventude Desportu Arte no Kultura Nélio Isaac Sarmento, maibé fallansu ida ne’ebé maka mosu bainhira jogu futeból atu komesa maka komisaun organizadora foin distribui farda ba jogadór sira.
“Ha’u rekomenda ba futuru bainhira realiza jogu fronteira Cup informa antes nune’e hadi’a preparasaun ba kondisaun haree ba kondisaun kampu Salele ne’e ladun ladiak, jogadór sira joga tatidik,”nia hateten.
Maske nune’e, jogu fronteira CUP 2025 iha Kovalima ho modalidade futeból, voleiból, basketból, maratona no kurrida kavalo kontinua la’o no partisipa hosi munisípiu Bobonaro no RAEOA.
Jornalista:Celestina Teles
Editór : Florencio Miranda Ximenes
