BOBONARU, 03 Outubru 2025 (TATOLI)-Diresaun Servisu Munisipál Asaun Sosiál (DSMAS) Bobonaru dezde Janeiru 2025 simu pedidu husi família hodi tulun transporta mate-isin hamutuk 259 no apoia mós kaixaun 21 ba família vulneravel sira.
Diretora SMAS Bobonaru, Maria de Sousa Verdial Gama, dehan apoia karreta funeráriu ne’e hodi kobre postu administrativu neen, inklui fatin balu iha munisípiu seluk.
“Ida-ne’e inklui [tula] mate-isin, mate-ruin, labarik ho ema sira ne’ebé mate. Iha 2025 ne’e, ita transporta ona mate-isin 259 no ami mós prodús kaixaun 120 hodi apoia ba ema vuneravel ne’ebé mate. Ita hatene, dalaruma família balu sosa kaixaun labele, ne’e mak ita-nia Governu tau osan hodi apoia. Ita apoia ona kaixaun 21, hahú segunda ami sei distribui tan ba postu lima tanba kompaña foin fornese mai”, nia informa ba jornalista sira, ohin.
Maria Gama dehan daudaun ne’e verba ba kombustivel atu apoia operasionalizasaun karreta funeráriu sufiente hela, maibé dalaruma labele reponde pedidu família matebian ho urjénsia, tanba SMAS Bobonaru enfrenta hela problema limitasaun ba karreta ne’e.
Diretora ne’e haktuir katak, durante ne’e, karreta funeráriu unidade rua de’it mak halo operasaun iha postu administrativu neen, inklui tula mate-isin sai husi Bobonaru.
“Dalaruma pedidu tama hanesan, iha atendimentu oras hanesan, entaun ami tenke koordena ho família matebian oinsá bele muda oras hodi halo atendimentu hotu, tanba carro rua de’it ne’e la sufisiente”, nia hato’o.
Aleinde ne’e DSMAS mós responde pedidu família matebian ho tarde tanba la prienxe rekizitu.
“Sira tenke lori kartaun eleitorál família nia ho matebian nia. Karik fornese ona ami mós prosesa hodi marka oráriu katak oras ida-ne’e komunidade naran ne’e hanesan ne’e presiza apoia atu tula mate-isin husi fatin ida ne’e bá fatin ida ne’ebá. Maibé kada vez via telefone dehan ami presiza transporte, entaun ami dehan prepara dukumentu no motorista to’o entrega”, dehan.
Atu responde ba preokupasaun komunidade, iha orsamentu tinan ne’e Autoridade Munisípiu Bobonaru halo ona akizisaun ba karreta funeráriu foun ne’ebé daudaun ne’e iha hela prosesu aprovizionamentu.
Diretora ne’e fundamenta katak SMAS mós mehi ba futuru hakarak tau karreta ida ba kada postu administrativu hodi halo atendimentu lais liután.
“Para hamenus gastu ne’ebé iha, tanba ita haree distánsia dook, karik labele, entaun postu rua karreta ida. Ami hanoin katak Balibó ho Atabae karreta ida, Lolotoe-Bobonaru ida, Maliana ho Kailaku más konsentra iha Maliana. Postu Vila nia labele ida, nia tenke rua tanba ita hare komunidade barak, depois iha Vila ema kawin silang ne’e barak, dalaruma mate ita Timór ne’e tenke lori bá nia família”, realsa.
Lembra katak iha tinan 2024 ne’e SMAS Bobonaru apoia transporta tula mate-isin hamutuk 292.
Notisía relevante: SMASA Bobonaru hadi’a ona sistema kanalizasaun bee-moos ba aldeia Halekou
Jornalista: Sergio da Cruz
Editora: Maria Auxiliadora
