DILI, 08 Outobru 2025 (TATOLI)—Governu liuhusi Primeiru Ministru, Kay Rala Xanana Gusmão hamutuk ho desizaun Koletiva husi lina ministeriál sira, kuarta ne’e, liuhusi reuniaun Konsellu Ministru aprova proposta kona-ba estabelese númeru vaga promosaun na ptofisionál saúde sira-ne’ebé halo parte husi karreira profisionál saúde nian iha administrasaun públika.
Projetu Rezolusaun Governu nian ida aprezenta husi Ministra Saúde, Elia A. A. dos Reis Amaral, hetan mós aprovasaun husi Governu iha reauniaun Konsellu Ministru ne’ebé hala’o iha Palásiu Governu.
Ministériu Saúde (MS), Elia dos Reis Amaral, hateten iha loron 24 Setembru 2025 ne’e nia parte aprezenta dekretu-lei ida oinsá bele promove ba iha enkuadramentu ka promosaun ba funsionáriu saúde sira.
“Ho ida-ne’e mak ami finaliza no termina ona katak presiza atu halo rezolusaun Governu lori mai Konsellu Ministru kona-ba vaga ne’e. Vaga sira-ne’ebé ita aprezenta no profisionál saúde nian ho totál hamtuk 2.016, nune’e pesoál sira-ne’e promovidu iha promosaun ne’ebé Mnistériu Saúde fó sai ohin. Signifika, sira sei hasa’e sira-nia eskalaun no grau ne’ebé mak iha,” Ministra Elia relata ba jornalista sira iha Palásiu Governu, ohin.
Tuir komunikadu ne’ebé fó sai iha portál Governu katak rezolusaun Governu nian, ne’ebé aprova tuir Dekretu-Lei nú 31/2025, loron 24 fulan-Detembru, define númeru husi vaga ba promosaun profisionál sira iha karreira médika, enfermajen, parteira profisionál no tékniku diagnóstiku, terapéutika no saúde públika, iha ámbitu rejime espesiál funsaun públika nian.
Nune’e ho medida ida-ne’e kumpre kompromisu Governu nian atu valoriza profisionál saúde sira no asegura rekoñesementu ba sira-nia méritu no durasaun servisu nian, hodi promove motivasaun, retensaun no estabilidade husi kuadru sira-ne’e, ne’ebé kualifikadu tebes iha Servisu Nasionál Saúde nian.
Totál estabelesementu ba vaga promosaun hamutuk 2.016, ne’ebé fahe entre karreira diferensa mak hanesan (1) Karreira Médika: vaga 376; (2) Karreira Enfermajen: vaga 985; (3) Karreira Parteira Profisionál: vaga 293; (4) Karreira Tékniku Diagnóstiku, Terapéutika no Saúde Públika: vaga 362.
Jornalista : Alexandra da Costa
Editór : Cancio Ximenes
