F-KHK oferese formasaun ba GHF kona-ba hamenus violénsia doméstika
VIKEKE, 09 Outubru 2025 (TATOLI)—Organizasaun Naun Governamentál Fundasaun Knua Haberan Komunidade (F-KHK) servisu hamutuk ho Gabinete Apoia Sosiadade Sivíl (GASS) realiza formasaun ba Grupu Hakbiit Família (GHF) kona-ba hamenus violénsia kontra feto no mane hirus.
Reprezentante Diretór F-KHK, Marito da Silva haktuir formasaun ida-ne’e kontinuasaun husi tinan 2024 ne’ebé oferese ba membru GHF sira hodi fó hanoin filafali ba membru grupu sira liga ba mane hamenus violénsia kontra feto no mane hirus.
“Formasaun sira-ne’e ita realiza tanba ita haree iha Munisípiu Vikeke ita uza sistema rua. Ida, sistema patriarkál no matriarkál uza iha Manatutu no Bobonaru sira. Entaun, ita uza sistema patriarkál ne’e halo ita-nia inan-feton sira sai vítima no vulneravel ba sistema ida-ne’e. Ho ida-ne’e mak ita hili tema ‘mane hamenus violénsia kontra feto no mane hirus’. Ita hakarak oinsá mane sira tenke utiliza sira-nia responsablidade no podér hodi proteje ita-nia inan-feton sira no proteje oan sira,” Marito da Silva hateten ba TATOLI iha Sentru GHF, Suku Uaitame, Postu Uatulari, Kinta ne’e.
Atu muda sistema patriarkál, nia dehan, F-KHK sei kontinua luta hodi fó hanoin ba inan-aman sira atubele muda mane sira-nia mentalidade.
“Tanba aman sira mak iha responsablidade no sira mak proteje, tau-matan ba ita-nia feton no oan sira,” nia subliña.
Iha fatin hanesan, Xefe Suku Uaitame, Marcelino Pinto Alves esplika autoridade suku sempre fó apoia ba grupu GHF ne’ebé eziste iha Suku Uaitame no Suku Matahoi ne’ebé hala’o atividade peska, ortikultura no rai no impresta osan.
“Liuhusi formasaun sira-ne’e bele ajuda ita-nia grupu sira foku ba atividade sira-ne’ebé fó benefísiu ba sira tanba grupu atu metin presiza hasa’e kapasidade atu jere grupu, entaun formasaun sira-ne’e bele eleva sira-nia koñesimentu liga ba violénsia sira,” nia esplika.
Aleinde ne’e, Reprezentante Koordenadór GHF, João Pinto hato’o agradesimentu ba F-KHK ne’ebé oferese formasaun ba membru GHF no formasaun ida-ne’e sai importante ba grupu atu lori grupu la’o bá-oin.
“Tanba dalabarak mosu konflitu entre membru sira bele hamosu hirus malu, deskonfia malu, entaun bele afeta ba grupu fahe malu. Nune’e, liuhusi formasaun sira-ne’e bele eduka no motiva ami oinsá halakon violénsia no foku ba mi-nia atividade sira hanesan peska, ortikultua, rai no impresta osan hodi hadi’a ami-nia moris no hadi’a ekonomia família uma laran,” nia tenik.
Entretantu, formasaun ne’e partisipa husi autoridade lokál, veteranu, joven feto, mane, membru GHF na’in-30. Formadór ba formasaun ne’e maihusi F-KHK no formasaun hala’o durante loron rua, hahú 09-10 Outubru.
Jornalista: Vitorino Lopez da Costa
Editór: Xisto Freitas da Piedade
