Inaugura ona morru protesaun SFP Beasu

VIKEKE, 09 Outubru 2025 (TATOLI)—Inaugura ona iha Kinta ne’e obra morru protesaun Sentru Formasaun Profisionál (SFP), Beasu, Suku Maluru, Postu Vikeke Vila, Munisípiu Vikeke.

Reprezentante Ministru Komérsiu Asuntu Ekonomia ne’ebé inaugura obra ne’e, Jorge Rui de Carvalho Martins haktuir morru protesaun ne’e la’ós proteje de’it, maibé ida-ne’e simboliza responsabilidade koletiva hodi habuaras no atinje foin-sa’e sira-nia prospridade iha futuru.

Jorge aprofunda morru referidu reflete fiar katak sentru sai metin tantu fíziku no asegura forsa traballu ida-ne’ebé iha kapasidade inovativa no kompetetiva.

Iha fatin hanesan, Reprezentante Prezidente Autoridade Munisípiu Vikeke, Simões da Silva hato’o agradesimentu ba Governu  ne’ebé finansia orsamentu ba konstrusaun morru protesaun ba Sentru Formasaun Profisionál Beasu.

“Ha’u hato’o agradesimentu ba Governu tanba tau orsamentu hodi konstrui morru portesaun ida-ne’e. Entaun, Governu nia responsabilidade mak kria morru portesaun ba Sentru Formasaun Beasu. Agora morru konkluidu ona, formadór no estudante sira mak responsabiliza oinsá mak segura morru hirak-ne’e,” nia hato’o.

Aleinde ne’e, Diretora Ezekutivu Senai Bekora, Bendita Pinto Miranda Gomes relata konstrusaun morru protesaun ne’e konstrui husi empreza husi Vikeke ne’ebé hahú konstrui iha fulan-Agustu 2024  ho kualidade.

“Nune’e, ha’u agradese ba empreza rua ne’ebé konstrui morru protesaun tanba empreza rua ne’ebé kontrui morru instala mós solár panél no ai-rame parpadu iha morru leten. Ho morru ida-ne’e bele proteje sentru formasaun ida-ne’e ho di’ak. Ha’u husu autoridade sira tau-matan ba morru atu ema labele riska no labele hakerek iha parede lolon sira,” nia dehan.

Konstrusaun morru SFP kaer husi empreza rua kompostu husi Empreza Finlos Unip, Lda no Empreza Sebas Unip, Lda, konstrui morru ho metru 750, gasta orsamentu hamutuk $61.000.00.

Partisipa iha inaugurasaun ne’e kompostu husi Diretór SEFOPE Vikeke,  Polísia Nasionál Timor-Leste (PNTL), Diretór Servisu Munisipál, Autoridade Suku Maluru, lia-na’in Suku Maluru, formadór SFP Beasu no estudante SFB Beasu. Sentru Formasaun Beasu estabelesidu iha tinan 2015.

Jornalista: Vitorino Lopez da Costa

Editór: Xisto Freitas da Piedade