ERMERA, 09 Outubru 2025 (TATOLI)–Sekretaria Estadu Kooperativa (SEKoop), Kinta ne’e, atribui sertifikadu no materiál produsaun ba formandu husi kooperativa oioin, ne’ebé tuir ona formasaun prosesamentu Bafo Kay Rala sai ai-han oioin iha munisípiu Ermera.
Formandu 30-resin mak tuir formasaun ne’e, maibé atribuisaun sertifikadu ba reprezentante na’in-ualu mak hanesan Sebastiana Babo, Arminda Martins, Albina Madeira, Elderito Martins, Manela de Araújo, no seluk tan.
Iha biban ne’e, Sekretáriu Estadu Kooperativa, Arsénio Pereira husu ba formandu sira ne’ebé hetan ona formasaun, ba oin tenke kontinua implementa no fahe matenek ba maluk sira seluk.
“Materiál ne’ebé imi simu sei fasilita imi halo produsaun ba Bafo Kay Rala, tenke aproveita didi’ak halo produsaun hodi bele fa’an iha kioske sira tanba Bafo Kay Rala hanesan matéria prima ida hodi ita halo produsaun, nune’e bele sustenta ekonomia família nian,” Sekretáriu Estadu hateten iha edifísiu Kooperativa Munisípiu Ermera.
Notísia relevante : SEKoop hakarak promove Bafo Kay Rala inklui iha programa Merenda Eskolár
Iha biban ne’e, governante ne’e husu ba kooperativa sira atu aproveita didi’ak no prepara-an tanba tinan oin Timor-Leste sei sai uma-na’in ba ASEAN Cooperative Ministerial Meeting.
“Ida-ne’e sei iha mós espozisaun ba produtu kooperativa sira. Buat ne’ebé agora imi halo ida-ne’e mak aban bainrua sei uza iha espozisaun, nune’e imi tenke prepara no aproveita didi’ak oportunidade sira,” nia akresenta.
Iha fatin hanesan, Diretora Nasionál Promosaun Produtu Kooperativa, Ana Paula Pacheco dehan, formandu sira ne’e tuir ona formasaun iha tinan kotuk, ne’ebé apreende kona-ba prosesamentu Bafo Kay Rala sai dosi oioin.
“Ohin ita distribui sertifikadu ba sira ne’e atu iha futuru sira sai fali treinadór ka formadór hodi habelar esperiénsia ne’ebé sira hetan karik tenke iha sertifikadu ida garante sira,” nia katak.
SEKoop entrega materiál prosesamentu hanesan oven listrik, mixer, basia, mákina tetu no seluk tan ba membru kooperativa sira.
Formandu Albina Soares de Carvalho sente orgullu tanba finalmente bele hetan sertifikadu.
“Formasaun ne’e ami hala’o durante loron-tolu de’it maibé ami apreende duni oinsá halo prosesamentu ba produtu Bafo Kay Rala sai dosi oioin hanesan kukis, paun, dosi xokolate no seluk tan,” Albina Soares tenik.
Nia dehan, formasaun no materiál ne’e ba oin la’ós rai de’it maibé ajuda kooperativa sira atu kontinua halo produsaun tanba produtu ne’e rasik kontein nutrisaun oioin.
“Ami nu’udar joven Ermera ne’ebé hamahon-an iha kooperativa sira, ba oin ami sei buka fatin hamutuk hodi halo prosesamentu Bafo Kay Rala sai dosi oioin hodi fa’an iha loja sira,” nia tenik.
Materiál sira ne’ebé ohin SEKoop entrega ne’e sei tau iha kooperativa Cu-Rohalik hodi halo prosesamentu ba produtu Bafo Kay Rala.
Jornalista : Arminda Fonseca
Editora : Julia Chatarina
